Монголын төмөр замын шинэчлэлтийн төсөлд Монголын мянганы сорилын сан /ММСС/-гаас 189 сая ам.доллар зарцуулахаар төлөвлөөд байгаа юм. Энэ нь АНУ-ын Мянганы сорилын корпорациас ММСС-нд олгосон нийт хөрөнгийн 66,3 хувь юм.

Монголын төмөр замын ачаалал сүүлийн жилүүдэд эрс нэмэгдэж байгаа. Ялангуяа, өмнөд хөрштэй хиллэдэг боомтуудаар барилгын материал их орж байгаагаас үүдэн овор хэмжээ ихтэй ачаа Улаанбаатар руу шилжүүлэн ачихын тулд их хугацаа алдаж саатдаг болсон.  Төслийн үндсэн зорилт нь зүтгүүрийн паркийг шинэчлэх, ачааны вагон худалдан авч нийлүүлэх, төмөр замын удирдлага, холбоо дохиоллын системийг шинэчлэх, замын засварын шинэ төхөөрөмж нийлүүлж хүчин чадлыг сайжруулахад оршиж байгаа аж. Мөн тэнд ажиллагсадын ур чадварыг дээшлүүлэх сургалт явуулж, шинэ техник эзэмшүүлэх юм байна. Эл төслийн хүрээнд төмөр замын 30-аад зүтгүүр, 150 орчим орчин үеийн ачааны вагон, төмөр замын дохиолол, холбоо мэдээллийн болон замын засвар үйлчилгээний тоног төхөөрөмж худалдан авах аж.

Төмөр замын салбарын ажилчин, инженер, албан хаагчдын дунд шинэ техник, технологийг танилцуулж эзэмшүүлэх болон салбарын орчин үеийн менежментийн сургалт дадлагыг төслийн хөрөнгөөр зохион байгуулах гэнэ. Түүнчлэн УБТЗ-ын төлөвлөлтийн тогтвортой байдлыг хангах, олон улсын хэмжээнд хүлээн зөвшөөрөгдсөн нягтлан бодох бүртгэлийн стандартыг нэвтрүүлж мөрдүүлэх юм байна.