Манай улсын барилгын тухай хуульд барилга байгууламжид тавих техникийн хяналтыг мэргэжлийн хяналтын байгууллагад ажиллах барилгын улсын байцаагч, зөвлөх үйлчилгээ эрхлэх хуулийн этгээд тус тус хэрэгжүүлнэ гэж заажээ. Гэтэл УМХГ 2006-2008 онд хэд хэдэн барилгын компанийн ажлыг шалгахад ноцтой олон зөрчил илэрч байгаа юм. Үүнд: Цутгамал төмөр бетон, бэхэлгээний бат бэх чанар нь зураг тесөлд заасан хэмжээнд хүрээгүй, стандартын шаардлага хангаагүй, чанарын төлөв байдал нь тодорхойгүй түүхий эд элс хайрга, арматур хэрэглэдэг, мөн хөдөлмөр хамгаалал эрүүл ахуйн зөвлөл ажиллуулдаггүй, барилга хоорондын байршил хэт ойр, зам талбай, авто машины зогсоол, ногоон байгууламж зэрэг тохижилтын ажлыг бага зайтайгаар төлөвлөсөн буюу огт төлөвлөөгүй байна.

УМХГ ч эдгээр зөрчлийн талаар улсын байцаагчын дүгнэлт гаргаж ЗТБХБЯам болон барилгын бусад байгууллагад хүргүүлдэг ч биелэлтийг нь эргэж тооцдоггүй. Зөрчлийг арилгах талаар хамтран ажиллахгүй явж иржээ. Шинэ орон сууцны талбайн хэмжээ хэрхэн тооцож худалддаг талаар журам байдаг ч хяналт муугаас сүүлийн жилүүдэд ашиглалтад орсон орон сууцны талбайн хэмжээ гэрээнд заасандаа хүрэхгүй байгаа талаар захиалагч, оршин суугчид байнга гомдол гаргаж байгаа билээ. Мөн стандарт тогтоогоогүй шинэ материал хийцийг хэрэглэх талаар тодорхой бодлого байхгүй тул хяналт шалгалт хийх барилга байгууламжийг улсын комисс хүлээж авах үед захиалагч гүйцэтгэгч нарт хүндрэл гарч байна. Тэр ч байтугай улсын комисс хүлээж аваагүй олон барилга байгууламжид захиалагч оршин суугч нар нүүж орж байна. Аль компанид хандвал найдвартай болох талаар ч бидэнд байнга хандсаар байдаг билээ.

Жич: Та бүхэн өөрийн байгууллага, орчин тойронд өрнөж буй сонирхол татам мэдээ мэдээллээ barilgamn@yahoo.com и-мэйл хаягаар бидэнд илгээнэ үү