Завхан аймгийн ЗДТГ-ын албан хаагчид ажлын байрнаасаа нүүж эхэллээ. Тус барилгын хаалга хаагдахаа больж шавар нь нурж зарим газраа нуралт үүсэх эрсдэлтэй байгаагаас нүүлгэн шилжүүлж байна.

Энэ барилга нь 1953 онд анх сургуулийн хичээлийн байрны зориулалтаар баригдаж байсан бөгөөд сүүлд 1973 онд дахин засварлан конторын зориулалттай болгож аймгийн ЗДТГазар үйл ажиллагаагаа явуулж эхэлжээ. Олон жилийн түүхтэй энэхүү барилгад 2000 оноос эхлэн мэргэжлийн байгууллага, улсын байцаагч нар үнэлэлт дүгнэлт өгч, хүн ажиллаж болохгүй гэсэн албан шаардлага, акт удаа дараа гаргасан байна. Эдгээрийг үндэслэн аймгийн ЗДТГ-ын ажлын байрыг шинээр бариулахаар Сангийн Яам, ЗГХЭГазарт төслийг хүргүүлсэн байна. Энэ асуудал 2007 онд шийдэгдэж, мөн оны 6-р сараас эхлэн барилгын ажил эхэлсэн боловч хэзээ ашиглалтад орох нь одоогоор тодорхойгүй байна. Учир нь орон нутагт барилгын материалын үнэ нэмэгдэж, хэрэгцээ ихэсч, материал дутагдсанаас болж байгаа ажээ. Энэхүү барилгын ажлыг Сумпакс-Асар өргөө компани гүйцэтгэж байгаа бөгөөд тус барилга 1.3 тэрбум төгрөгийн хөрөнгөөр баригдаж байна.