Солонгосын компани монгол ажилчдыг ОХУ руу гаргаж байгаа тухай яриа чих дэлслээ. Мэдээллийн мөрөөр Мэргэжлийн өвчин судлал, эмнэлэг, хөдөлмөр магадлалын төвд өчигдөр очиход бүртгүүлсэн монгол ажилчид эрүүл мэндийн үзлэгт орж байв. Эрүүл мэндийн үзлэгт орохоор дугаарлаж байгаа хүмүүсээс зарим зүйлийг тодруулсан юм.
-Та нар ОХУ-д барилга барихаар явах гэж байгаа юм уу?
-Барилгын мэргэжилтэй хүмүүсийг л сонгон шалгаруулж, ОХУ руу явуулна гэсэн зарын дагуу “Эм-Энд-Жи” нэртэй Солонгосын компанид бүртгүүлсэн. Эрхүү хотод барилга барихаар явах юм гэсэн байх аа.
-Хичнээн хүн бүртгэсэн бол. Бүртгэл үргэлжилж байгаа юу?
-Энэ сарын есний өдөр телевизээр зарласан шүү дээ. Гэхдээ бүртгэлийг энэ сарын 15-ны өдрөөр тасалбар болгосон гэсэн.
-Ямар насныхныг бүртгэсэн бэ. Урьдчилсан төлбөр авсан уу?
-40-өөс доош насныхныг бүртгэж аөсан. Одоогоор ямар нэгэн төлбөр аваагүй л байна. Гэхдээ эрүүл мэндийн үзлэгт орж, тэнцсэнийхээ дараа гэрээтэйгээ танилцахаар бүх зүйл тодорхой болох биз гэв. Эрүүл мэндийн үзлэг нь уржигдраас эхэлсэн бөгөөд “Эм-энд-Жи” компанийн хэсэлтээр тус төв 160 гаруй хүнд эрүүл мэндийн үзлэг хийх юм байна. “Эм-Энд-Жи конст-ракшн” ХХК-ийн менежер С.Батгэрэлтэй уулзаж, зарим асуултад хариулт авав.
-Танай компани хэчнээн хүн ОХУ руу ажилчнаар гаргах гэж байгаа вэ. Ажиллах хүчин гадаадад гаргах тусгай зөвшөөрлөө холбогдох яамнаас нь авсан уу?
-Манайх Монгол-Солонгосын хамтарсан компани. Баянзүрх дүүргийн нэгдүгээр хорооны нутаг дэвсгэр дэх “Golden vill” цогцолбор, мөн Сүхбаатар дүүргийн нутаг дэвсгэрт байрлах “Blue sky” зочид буудал үйлчилгээний цогцолборыг барьсан. ОХУ-ын Эрхүү хотод 10 давхар, таван ч цогцолбор барина. ОХУ-ын захиалгын дагуу манай компани гүйцэтгэгчээр оролцоно. Тусгай зөвшөөрөл авсан эсэхийг би сайн мэдэхгүй байна.
-Хүмүүс Солонгост ажилласнаас дутуугүй өндөр цалинтай ажиллана гэлцэж байна?
-Манайд бүртгүүлсэн 300 гаруй хүн бий. Үүнээс өндөр шалгуураар шалгаж 100 гаруй хүнийг явуулна. Сарын цалин 500-600 ам доллар байна.
Замын зардал, эмчийн үзлэг, визийн зардлыг компани даана. Гэхдээ хүн тус бүртэй гэрээ байгуулна .
-Тэгээд хэдий хугацаатай ажиллуулах вэ?
-1.2-1.4 жилийн хугацаанд уг цогцолборыг барьж дуусгана. Манай компанийн солонгос ажилчид ч гэсэн явна.

Энэ ярианы дараа НХХЯ-ны Хөдөлмөр бодлого зохицуулалтын газрын мэргэжилтэн Батсууриас “Эм-Энд-Жи” компани гадаадад ажиллах хүчин гаргах тусгай зөвшөөрөл авсан эсэхийг лавлахад,
-Одоогоор гадаадад ажиллах хүчин илгээх 31 компани бүртгэлд байна. Эдгээр нэрсийн дотор “Эм-Энд-Жи” компанийн нэр байхгүй байна гэв.
Харин компанийн удирдлагуудаас албан ёсны зөвшөөрөлтэй эсэх болон компанийг нь хаана байрлаж байгааг нь асуусан боловч энэ талаар мэдээлэхийг хүссэнгүй. “Бидний утасны дугаарыг олж авсан шигээ, манайхыг хаана байдгийг олоод ирж уулзахгүй юу” хэмээн менежер гэх бүсгүй утасны цаанаас уцаарласан юм.