Ийм нэгэн боломжийг бидэнд Канад улсын барилгын институтийнхэн олгож байна.

Байгаль цаг уурын хувьд манай улстай их төстэй тус орон модон карказтай барилгыг нэлээн барьдаг аж. Ийм барилгын технологийн онцлог нь дулааны алдагдал багатайгаас гадна хуурай аргын технологи хэрэглэдгээрээ их онцлог ажээ. Энэ  нь барилгын сууринаас бусдад нь шавар шавхай зуурах гэх мэт нойтон аргыг ашигладаггүй гэсэн үг аж.

Манай улсад барилга барьж буй компаниудын хамгийн том бэрхшээл нь энэ  гэдэг. Түүнийг үгүй хийхэд уг технологи туслах гэнэ. Мөн түүнчлэн аль ч улиралд маш богино хугацаанд барьж болохоос гадна ашиглалтын зардал нь их хямд ажээ.

Монголд барьж байгаа манай барилгууд голчлон балка, тоосго, дүнз, бетон гээд зардал ихтэй нүсэр материалаас гадна дулааны алдагдал асар ихтэй  гэнэ.

Олон талын ач холбогдолтой барилгын технологийг харуулсан Канадын загвар байшингийн нээлтийн ажиллагаа өчигдөр боллоо. Нийслэлийн баруун дөрвөн замын хойхно орших нэг давхар эдгээр барилгыг үзэхээр олон хүн цуглажээ. Хэлбэр хийц, интерьер дизайн нь тун дэгжин энэ байшинг хэдэн давхар ч барьж болох юм байна. Хотын өнгө үзэмжид чимэг нэмэх энэ барилгыг хаана ч барьж болох нь тун боломжийн санагдаж байсан. Ялангуяа хотын захын хороолол, мөн орон нутагт өнгө нэмэх л сууц байна лээ. Тохилог энэ байшин хоёр сарын өмнө баригджээ. Энэ хугацаанд 900 гаруй иргэд үзэж сонирхсон ажээ.

Канадын ойн аж ахуйн шинэ технологи, хөрөнгө оруулалтын агентлагаас санхүүжиж байгаа энэ төслийн хүрээнд барилгын мэргэжлийн ажилчдад болон иргэдэд, барилгын дизайнеруудад, хөрөнгө оруулагчдад зориулсан сургалтыг нэг жилийн хугацаанд зохион байгуулах ажээ. Мөн өчигдрөөс эхэлж банкныхан болон хэвлэл мэдээл­лийнхэнд зориулсан сургалтыг эхэлсэн байна. Цаашид барилгын салбарын ажилтан бэлтгэж буй сургуулиуд, мөн барилгын салбарынхандаа энэ технологийн давуу талыг хүргэх бодолтой байна гэж Зам тээвэр, барилга хот байгуулалтын яамны газрын дарга Мягмар дурдаж байлаа.

Харин загвар байшингаа бариулах компаниа Канадууд төвөггүй олсон аж. Тэдэнтэй "АТА" трейд компани адил технологитой бөгөөд түүхий эдээ тэд Канадаас авдаг юм байна. Энэ чиглэлээр монголдоо нэгдүгээрт ордог ажээ. Жилдээ 40-50 захиалга авдаг гэж тус компанийн захирал С.Батсайхан ярьж байлаа. Тус компанийн бүтээгдэхүүнд иргэд тун сэтгэл хангалуун байдаг юм байна. "Бороо гоулд" зэрэг компанийн байшинг барьж өгснөөс гадна Нүхт, Баянголын амын  ойролцоох олон байшинг барьсан аж.

Өдрийн сонин