Өнгөрсөн бүтэн жилийн турш тэмдэглэн өнгөрүүлсэн Их Монгол Улс байгуулагдсаны 800 жилийн ойг тохиолдуулан Кувейтийн засгийн газраас Манай улсад 12 сая ам.долларын буцалтгүй тусламж үзүүлэх шийдвэр гаргасан билээ. Уг мөнгөөр парламентын ордон барихаар тогтоод байгаа юм. Арабын эдийн засгийн хөгжлийн Кувейтийн сангийн орлогч захирал Хешам Аль-Вакаян, сангийн сайд Н.Баяртсайхан нар Төрийн шинэ ордон барих харилцан ойлголцлын санамж бичигт гарын үсэг зурлаа. Төрийн шинэ ордон барих төслийг Монгол-Кувейтийн хамтарсан компани хэрэгжүүлэх бөгөөд зөвлөх болон гүйцэтгэгч компаниудыг нээлттэйгээр сонгон шалгаруулж тодруулахаар талууд тохиролцсон байна. Ноён Хешам Ал-Вакаян санамж бичигт гарын үсэг зурсандаа баяртай байгаагаа илэрхийлээд Төрийн шинэ ордны нээлт удахгүй болно гэдэгт итгэлтэй байгаагаа илэрхийлэв.
Ордон барих мөнгө бэлэн болсон ч хаана барих нь одоог хүртэл тодорхой бус байгаа юм. Сангийн сайд Н.Баяртсайханы хэлснээр Төрийн шинэ ордон барих газрын гурван хувилбар байгаа ажээ. Эхний хувилбар нь Богд уулын Их Тэнгэрийн ам. Дархан цаазтай, төрийн төрийн тусгай хамгаалалттай тус энгэрт ордон босгох нь бэрхшээл биш боловч хотын төвөөс арай зайдуу хэмээн үзэж байгаа бололтой юм. Хоёрдахь нь одоогийн Төрийн ордон байгаа газрын хойд талын цэцэрлэг. Хамгийн сүүлийн хувилбар нь Хүүхдийн урлан бүтээх төвийн ар талын айлуудыг нүүлгэж, газар дээр нь шинэ ордон барих санаа. Энэ санааг ажил болгоно гэвэл тэр орчимд байгаа гэр хорооллын 150 орчим айлыг нүүлгэж таарна. Юутай ч дээрхи гурван хувилбарыг Засгийн газар УИХ-д хүргүүлжээ. Төрийн шинэ ордон барих газрын асуудлыг ойрын хугацаанд эцэслэн шийдвэрлэх юм байна.