Засгийн газраас санаачлан өргөн барьсан Барилгын тухай хуулийн төсөл эрх эм гишүүдийг багагүй бухимдуулаад авлаа. Барилгын салбарынхан оволзож буй энэ үед уг хууль зайлшгүй чухал ч хуулийн төсөл бус бантан хутгаж ирлээ хэмээн гишүүд ажлын хэсгийнхэнд хатуурхахад хууль засварласан зэм хүртээд буй УИХ-ын дарга ч ташуур нэмээд жигтэйхэн. “Ийм л юм оруулж ирдэг б олохоор нь би засдаг юм шүү дээ. Хуулийн төсөл санаачлагчид, Засгийн газар үүнийг байнга санаж яв” хэмээн Ц.Нямдорж дарга өгүүлэв. Төсөл санаачлагч Барилга хот байгуулалтын сайд Ж.Наранцацралтыг илтгэл тавьсны дараа үг авсан Р.Амаржаргал гишүүн “Төсөл санаачлагчид зорилтоо нэг унш даа” гэсээр үгээ эхлэв. “Барилгын ажил шинэчлэл гэсэн юм оруулж ирэх юм. Ийм юм гэж юу байсан юм. Барилгын тухай хуулийг УИХ батлана гэжээ. Өөр хэн батлах вэ дээ. Зүйл заалтыг олон болгох ядмаг арга нь энэ. Төсөлд дурьдсан төв байгууллага нь амихандаа Барилга хот байгуулалтын яам юм шиг байна. 6.1.10-аа аваад үз дээ. УИХ-ыг нэг бол бодлого боловсруулдаг, эс бөгөөс тодорхойлдог мэтээр бичсэн байна” гэж хуулийн төслийг голоод, уншихад хэцүү хаяхад хэцүү гэсэн юм. Барилга хот байгуулалтын дэд сайд Ц.Дашдорж “Барилгын тухай хуучин хуульд ийм үг өгүүлбэр бий” гэсэн нь гал дээр тос нэмж орхилоо. Алдаатай зүйл байвал засахын тулд хуулийн шинэчилсэн найруулгыг хийдэг хэмээн гишүүд дэд сайдыг загналаа. 1998 онд батлагдсан Барилгын тухай хуулийн нийт заалтын 71,4 хувьд нэмэлт өөрчлөлт оруулж буй учир уг хуулийн төслийг шинэчилсэн найруулга хэмээж буй. Барилгын баталгаат хугацааг хэдэн жилээр тооцож байгаа вэ гэсэн асуултдаа эрхэм гишүүн А.Бакей хариу авч чадсангүй. Хуулийн төсөл санаачлагчид асуултдаа бүрэн хариулахгүй зэргээс нилээд бухимдуу байсан гишүүдэд хуулийн төсөл тав, зургаахан хуудас байсан нь бас л таалагдсангүй. Д.Ганхуяг гишүүн “Барилгын салбарыг арав хүрэхгүй хуудсаар тооцож болохгүй” гээд чанартай, чанаргүй олон барилга баригдаж буй энэ үед барилгын стандартыг тодорхой зааж өгөх ёстойг онцоллоо. Ингэхгүй бол хэдхэн жилийн дараа чанаргүй барилгууд нурж, одоогийн хадгаламж зээлийн хоршоодын хохирлоос илүү аюул нүүрлэж мэднэ шүү хэмээн анхааруулав. Харин З.Энхболд гишүүн уг хуулийн төслийг хүн аюулгүй амьдрах барилгын тухай биш, Барилгын яамны дүрэм шиг гэж өөлөв. Тэрээр уг хуулийн төслийн гол агуулга нь хүний аюулгүй байдалд холбогдох учир барилга барих техникийн хяналт байх ёстой гэлээ. Гэтэл хуулийн зургадугаар бүлэгт үүнийг ганцхан хуудсанд тусгасанд гишүүд сэтгэл дундуур байв. Р.Гончигдорж гишүүн барилгын гол шалгуурын нэг нь газар хөдлөлтийг тэсвэрлэх чадвар, гэтэл хуульд энэ талаар дурьдаагүй байна гэж шүүмжиллээ.
С.Баярцогт гишүүн хуулийн төслөө татаж авахыг Барилга хот байгуулалтын яамныханд эелдэгхэн зөвлөөд нэгэн жишээг иш татав. Эдийн засаг нь өсч эхлэсэн үед Солонгост барилгын салбарын эрэлт их байж, яг л одоогийн манай улсынх шиг чанаргүй барилга ихээр баригдсан гэнэ. Гэтэл 20 жилийн дараа “но” илэрч чанаргүй барилгууд нурсан жишээг С.Баярцогт гишүүн сануулсан юм. Ийм байдалд хүрэхгүйн тулд Барилгын тухай хуульд барилгын бүхий л стандартыг нарийвчлан тусгах хэрэгтэй гэж тэрээр хэлэв. Гишүүд энэ мэтээр зөвлөсөн, зэмлэсэн үг хэлж асуулт асуусан ч төсөл санаачлагчид тоймтой хариу хэлэхгүй байсан юм. Гишүүдийн хэлснээр дэндүү төвөгтэй хуулийн төслийг хэлэлцэх эсэхийг шийдэхийн өмнө дэмжсэн гурав, дэмжихгүй байгаа гурван гишүүн саналаа хэллээ. Б.Батбаяр, Л,Одончимэд, Ц,Дамиран нар дэмжиж, З.Энхболд, Г.Занданшатар, С.Баярцогт нар эсэргүүцсэн үг хэлэв. З.Энхболд гишүүн ”Засварлаад явж болдог хуулийн төсөл байдаг. Энэ бол арай дэндүү” хэмээн учирласан ч гишүүдийн олонхи Барилгын тухай хуулийн төслийг УИХ-аар хэлэлцэхээр санал өгч Байнгын хороонд шилжүүллээ.