Ерөнхий сайд С.Баяр олон улсын болон Монголын ахмадын өдрийг тохиолдуулан Ерөнхий сайд асан Ш.Гунгаадорж, Монголын ахмадын холбооны ерөнхийлөгч О.Цэндсүрэн, МАЧХ-ны тэргүүн Г.Баасан нарыг өчигдөр хүлээн авч уулзан төр, засгаас ахмадуудын талаар авч хэрэгжүүлж байгаа арга хэмжээний тухай товч мэдээлэв.

Ш.Гунгаадорж Засгийн газрын тэргүүнд хандаж ахмадуудыг нийгмийн амьдралд татан оролцуулах, ахмад, залуу үеийн харилцаа, хамтын ажиллагааг сайжруулах талаар санаачилгатай ажиллах нь чухал хэмээлээ. МАХ-ны Ерөнхийлөгч О.Цэндсүрэн ахмадуудын нийгмийн хамгааллын талаар гаргасан шийдвэр, хууль, тогтоомжийг хэрэгжүүлэх ажилд шат шатанд нь хяналт тавьж ажиллах шаардлагатайг тэмдэглээд, Монгол Улсын өндөр настны стратегийг ойрын хугацаанд батлахыг хүсэв. Уулзалтад оролцогсод дайнд оролцсон ахмад дайчдад орон сууцыг нь яаралтай олгохыг хүсч байлаа. Ерөнхий сайд тэдний санал хүсэлтийг сонссоны дараа үнийн хөөрөгдөл, инфляцийн өсөлт ахмадуудын амьдралд хүндээр тусч байгаад харамсаж буйгаа илэрхийлээд, хамгийн түрүүнд тэдний төлөө тодорхой арга хэмжээ авахад залуу, дунд үеийнхэн гомдохгүй гэдэгт найдаж байна гэлээ гэж Засгийн газрын хэвлэл, мэдээллийн албанаас мэдээлэв.