АНУ-д одоо тохиолдсон санхүүгийн хямрал уршиг дагавар, цар хэмжээгээрээ Их уналтын үеийнхээс ч давж байна гэж Мексикийн тэрбумтан Карлос Слим үзэж байна.

"Би амьдралдаа үзсэн хамгийн ноцтой санхүүгийн энэ хямрал 1929 оны их уналтынхаас ч илүү түвэгтэй, гүнзгий юм" гэж 60 тэрбум долларын хөрөнгө эзэмшдэгээрээ дэлхийд хоёрт ордог Карлос Слим Мехикод болсон хэвлэлийн бага хурал дээр мэдэгдлээ. АНУ-д 1929 онд эхэлж, зөвхөн 1930-аад оны сүүлийн хагаст дууссан их уналт өрнөдийн хамгийн хөгжингүй орнууд төдийгүй, бусад бүх улсыг нэрвэсэн юм. Аж үйлдвэрийн хотууд хамгийн их нэрвэгдэж, хэд хэдэн оронд барилгын ажил хэрэг дээрээ зогссон. Төлбөрийн чадвартай эрэлт багассаны улмаас хөдөө аж ахуйн бүтээгдэхүүний үнэ 40-60 хувь буурсан юм.

Дэлхийд тохиолдсон эдийн засгийн одоогийн хямралаас нэг ч орон өөрийгөө хамгаалж чадахгүй гэж Слим үзэж байна. Банкны салбар, ипотекийн зээлийн салбарт тохиолдсон санхүүгийн хямрал ойрын үед бодит эдийн засгийн салбарыг хамрах вий гэдгээс мексик баян сэтгэл хамгийн их түгшиж байна.

"Одоо банк, ипотекийн сангийн эзэд, тэдгээрийн хувьцаа эзэмшигчид нэрвэгдэж байна, гэхдээ санхүүгийн хямрал аж үйлдвэр, хөдөө аж ахуйг хамарвал үүнээс болж бүгдээрээ нэрвэгдэнэ" гэж мексикийн тэрбумтан хэллээ.

Америкийн эрх баригчид санхүүгийн хямралын уршгийг багасгах арга хэмжээг хожимдож авсан гэж Слим үзэж байна. Харин ерөнхий чиглэлээ зөв сонгосон гэж тэр хэлжээ. Одоо дэлхийн санхүүгийн системийг тогтворжуулах, хөрөнгө оруулагчдын итгэлийг сэргээх, банкны системээс мөнгө гарахыг зогсоох зэрэг эн тэргүүний зорилтыг шийдвэрлэхэд анхаарлаа төвлөрүүлэх шаардлагатай байна гэж Мексикийн тэрбумтан үзэж байна.