Хэдэн жилийн өмнө Дундговь аймгийн Мандалговь хотын төвд халаалт, цэвэр усны шугамд ойр, байршил тохиромжтой газруудыг өмчилж авсан иргэд өнөөдөр тэндээ амины орон сууц барьж байна.

Энэ ажил зуны турш барилгын ажил эрчтэй өрнөж, өрлөгчин мэргэжилтэй иргэд ч түр ажлын байраар хангагдаад завгүй байгаа аж. Хүйтний ам наашлахаас өмнө амжиж орон сууцтай болох гээд иргэд шаргуу зүтгэж байгаа ч эдгээр барилгыг чанарын ямар түвшинд хэрхэн барьж байгаад нь мэргэжлийн байгууллагаас тавьж байгаа хяналт байхгүй , иргэд "хар ухаанаар" барьж байгаа нь анхаарал татаж байна.

Уг нь барилгын тухай хуулинд зааснаар өмчийн хэлбэр харгалзахгүйгээр баригдаж байгаа бүх барилга, байгууламжид техник хяналт хийх ёстой байдаг аж. Гэтэл энд ямар ч хяналт алга. Иргэд аймгийн мэргэжлийн хяналтын болон Барилга, хот байгуулалтын албанд барилгын зураг төслөө танилцуулж, барилга барих хүсэлт гаргах ёстойг холбогдох албаны хүмүүс хэлж байгаа ч үүний дагуу хандсан иргэд байхгүй, энэ талаар ухуулан таниулсан ч юмгүй явсаар. Чухам хэн хэрхэн хяналт тавьж, баригдаж байгаа барилга, байгууламжийн цаашдын хувь заяанд анхаарах нь орон нутагт одоогоор тодорхойгүй байна.

Иргэд байшин барилгадаа орон нутагтаа үйлдвэрлэдэг барилгын материалыг голдуу ашигладаг байна. Гэвч тоосгоны хэмжээ нь стандартаас бага агаад 1кв.м-т 51 тоосго өрөх ёстой бол энэ хэмжээний талбайд 57 тоосго ордог гэж байлаа.

МОНЦАМЭ