Монгол улсын ерөнхий сайд М.Энхболд өнгөрөгч баасан гарагт 40 мянган айлын орон сууцны талаар УИХ-д мэдээлэл хийлээ. Эхлээд эрх зүйн орчны талаар мэдээлэл хийсэн бөгөөд НӨАТ болон гаалийн албан татвараас барилгын ажилд шинэчлэлт хийх зориулалттай зарим материал, тоног төхөөрөмж, машин механизм болон хуванцар хоолой, цемент шохой, чулуу, дулаан тусгаарлах болон гипсэн хавтангийн үйлдвэрийн тоног төхөөрөмжийн нэр төрөл, тоо хэмжээний жагсаалтыг Засгийн газрын 2005 оны 193 дугаар тогтоолоор баталж мөрдүүлсэн. Мөн Барилгын тухай хууль, Хот байгуулалтын тухай хуулиудын шинэчилсэн найруулга, Үл хөдлөх хөрөнгийг барьцаалсан үнэт цаасны зах зээлийн тухай хуулийн төслүүдийг УИХ-д өргөн бариад байна. Орон сууцны тухай хуульд нэмэлт өөрчлөлт оруулах тухай, Хөрөнгө итгэмжлэлийг удирдах тухай хуулийн төсөл, Хөрөнгө оруулалтын сангийн тухай хуулийн төсөл, Газрын тухай багц хуулийн нэмэлт, өөрчлөлт оруулах тухай хуулийн төслүүдийг эхний хагас жилийн дотор УИХ-д өргөн барихаар төлөвлөж байна.
40 мянган айлын орон сууц хөтөлбөрийг хэрэгжүүлэх “Орон сууцны санхүүжилтийн корпораци” ХХК-ийг Сангийн яам, БХБЯ, НЗДТГ-ын оролцоотойгоор байгуулсан. Барилгыг санхүүжүүлэх 60 тэрбум төгрөгийн бондын арилжааг эхлүүлж, нэг тэрбум төгрөгийн бонд арилжаалсан. Бондын үлдсэн хэсгийг хийх ажилтай нь уялдуулан борлуулах болно. Хөтөлбөрийн хүрээнд сум дундын төвд энэ ондоо багтааж 8-н айлын, 126 сумын төвд 4-н айлын, 21 аймгийн төвд 40 айлын орон сууцыг тус тус барихаар төлөвлөж байна. Үүний үр дүнд хөдөө сумын төвүүдэд 984 өрх, аймгийн төвүүдэд 1060 өрх, нийт 2044 өрх шинэ байранд орно. Аймгийн төвүүдэд барих төрийн албан хаагчдад зориулсан 20 айлын сууцыг оны өмнө ашиглалтанд оруулахаар төлөвлөж байгаа. Бага, дунд орлоготой иргэд, залуу гэр бүлд зориулсан 80 айлын орон сууц 6-г Улаанбаатарт барина. Нийт 480 бага дунд орлоготой буюу залуу гэр бүлийг орон сууцаар хангана. Үүнийг бондын хөрөнгөөр барих бөгөөд энэ ондоо багтаан дуусгах төлөвлөгөөтэй. Улаанбаатар хотод төрийн албан хаагчдын орон сууцыг барихад нийт 4,3 тэрбум төгрөг хуваарилахаар төлөвлөсөн гэлээ.
Улсын төсвөөс барилга, орон сууц, нийтийн аж ахуйн салбарт энэ жилд 16 тэрбум 428 сая төгрөгийн хөрөнгө оруулахаар төлөвлөж байна. Үүгээр орон сууцны дулаан бохирын сүлжээ шинэчлэн солих, шинээр дэд бүтэц барина. Мөн Улаанбаатар хотын нийтийн байрнуудын цахилгаан шатыг засварлах ажлыг хийх гэнэ.
Орон сууцны санхүүжилтийн төслийн хүрээнд нийтдээ 2014 зээлдэгчид 22,3 тэрбум төгрөгийн зээл олгосон. Зээлийн дундаж хэмжээ 11 сая төгрөг бөгөөд үүний 16 тэрбум төгрөгийг Азийн хөгжлийн банкнаас олгосон. Баянхошуу, Чингэлтэйн гэр хорооллын цэвэр усны шугамын 4 тэрбум төгрөгийн ажил 5-н сараас эхлэнэ. Нийслэлийн ус сувагийн газарт бохир зайлуулах 500 сая төгрөгийн өртөг бүхий 15 машиныг энэ 4-р сард нийлүүлнэ. Өндөрхаан, Мандалговь, Баруун-Урт, Булган хотуудын 1085 айл өрхөд 338,7 сая төгрөгийн өртөг бүхий агшин зуурын ус халаагчийг суурилуулж, энэ оны 6-р сард ашиглалтанд оруулахаар төлөвлөж байна.
“40 мянган орон сууц” хөтөлбөрийн хүрээнд орон нутгийн хөрөнгө оруулалтаар орон сууц баригдсаар байна. Үүнд, Сүхбаатар аймагт 25 айлын, Эрдэнэтэд 221 айлын гэх мэтээр үргэлжилнэ. Орон сууцны санхүүжилтийн хүрээнд 15 сая төгрөгийг 10 хүртэл жилийн хугацаатай, жилийн 12-14 хувийн хүүтэйгээр нийт 6,3 тэрбум төгрөгийг оролцогч банкууд хуваарилсан байна хэмээн мэдээлсэн юм.