2004-2008 онуудад хэрэгжүүлэх Монгол улсын засгийн газраас хэрэгжүүлэх үйл ажиллагаагы хүрээнд босох “Улаанбаатар усан цэнэгт цахилгаан станц”-ын шав тавих ёслол боллоо. Сонгиноххйрхан дүүргийн 20-р хорооны нутаг Сонгинохайрханы Залаа толгойн энгэрт баригдах уг байгууламжийг “Туул сонгино усны нөөц” компани гурван жилийн хугацаанд барин бүрэн хэмжээнд ашиглалтанд оруулахаар болжээ. Уг төслөөр “Улаанбаатар усан цэнэгт цахилгаан станц”, “Хотын усан хангамжийн доод эх үүсвэр”, “Хаягдал ус цэвэршүүлэх байгууламж” гэсэн гурван объектийг барин ашиглалтанд өгөх юм байна.
Усан цэнэгт цахилгаан станц бол түвшингийн зөрүү бүхий хоёр усан сан байгуулж, шөнийн цагт хэрэглэгчдийн цахилгааны хэрэглээ багассан үед доор байрлах усан сангийн усаа дээш нь өндөр чадлын шахуургаар шахаж нббцлөөд өдрийн цагт буцааж буулгах замаар цахилгаан үйлдвэрлэх гэнэ. Мөн нийслэлийн төв цэвэрлэх байгууламжаас гарч байгаа хагас цэвэршилттэй усыг ундны ус болгон цэвэршүүлснээр Улаанбаатар хотын ундны усны хэрэглээг 2050 он хүртэл хангах, хөрсний усны нөөц бий болгох боломжийг бүрдүүлэх аж. Хамгийн чухал нь энэхүү төслийг хэрэгжүүлснээр Улаанбаатар хотын цахилгаан хангамжийн найдвартай байдал сайжирч, цахилгаан тасрах зовлонгүй болох ажээ.
Дээрхи цогцолборыг байгуулахад урьдчилсан тооцоогоор 100 сая ам.доллар шаардлагатай байгаагийн 80 хувийг гадны банкны зээлээр, үлдсэн 20 хувийг дотоодын хөрөнгө оруулагчдын хөрөнгөнөөс хувьцаа хэлбэртэйгээр бүрдүүлэхээр болжээ.