Нийслэл хотод газар хөдлөлтийн чичирхийлэл мэдрэгдлээ. Энэ чичирхийлэл нь ОХУ-ын Эрхүү муж, Буриадад 6.3 баллын хүчтэй хөдөлсөн газар хөдлөлтийн нөлөөлөл гэж үзэж байгаа аж. Байгаль нуурын орчимд 09.35 цагт 6,3 баллын хүчтэй газар хөдлөлт болсон байна.

Энэхүү газар хөдлөлтийн чичиргээ манай улсын Нийслэл хот, Эрдэнэт хотуудаар илүү хүчтэй мэдрэгдлээ. Одоогоор нэгдсэн мэдээлэл хараахан гараагүй байна. Нийслэл хотод ойролцоогоор 4 баллын хүчтэй газар хөдлөлт болсон хэмээн ШУА-ийн Физик техникийн хүрээлэнгийн Газар хөдлөлтийн чичиргээ хэмжих төвөөс мэдээлж байна. Гэвч нийслэлд харилцан адилгүй мэдрэгдсэн байна. Энэ нь тухайн барилгын хөрс /хатуу, зөөлөн/, барилгын чанар, өндөр намаас хамаардаг ажээ. Жишээ нь харьцангуй өндөр байшинд хэлбэлзэл илүү хүчтэй байдаг байна. Зарим газар чийдэнгийн бүрхүүл нь савалж мэдрэгдсэн бол зарим газар ширээ хөдлөх гэх мэт үл мэдэг хөдөлжээ.

Газар хөдлөлтийн голомтод хүчтэй чичиргээ үүссэн учир ОХУ-ын судлаачдын газар дээр нь ажиллаж байгаа ажээ. Газар хөдлөлтийн давтамж гарах эсэхийг судалж байгаа хэмээн албаны хүмүүс мэдээлж байна.