Манай улсад хоёр дахь өдрөө айлчилж буй Данийн угсаа залгамжлах ханхүү Фредерик өнөө өглөө Монгол-Данийн хамтарсан "Эрчим хүч" семинарт оролцож үг хэлжээ.

Тэрээр хоёр улсын хооронд дипломат харилцаа тогтоосны 40 жилийн ойгоор айлчлал тохиож буйд баяртай байгаагаа илэрхийлээд анх 12 жилийн өмнө ирж байсантай харьцуулахад Монгол Улс маш их өөрчлөгчдсөн, эдийн засагт нь ахиц дэвшил гарч хөгжиж буйд сэтгэл ханамжтай буйгаа илэрхийлэв. Данийн зүгээс эрчим хүчний салбар дахь хамтын ажиллагааг эрчимжүүлэх боломж буйг семинарын үеэр онцлоод ялангуяа сэргээгдэх эрчим хүч, нар, салхины цахилгаан үүсгүүртэй холбоотой үйл ажиллагааг дэмжих боломжтойг мэдэгдлээ.

Дани Улс нь Монголыг ардчиллын замд хөл тавиад удаагүй байхад буюу 1992-1997 онд "Шилжилтийн орнуудын тусламжийн хөтөлбөр"-төө хамруулж, нийт 26 сая гаруй ам.долларын буцалтгүй тусламж үзүүлж байжээ. Энэхүү тусламжийн дагуу хөдөө аж ахуй, эрчим хүч, байгаль орчин, хэвлэл мэдээлэл, боловсролын салбарт төсөл, хөтөлбөрүүд ихээхэн үр дүнтэй хэрэгжсэн тухай семинарын үеэр яригдсан юм. Засгийн газрынхаа шугамаар үзүүлж байсан шилжилтийн үеийн тусламжаа тус улс 1998 онд зогсоосон бөгөөд түүнээс хойш тусламжийг ТББ-уудаар дамжуулан хэрэгжүүлэхээр болсон байна. Үүний тодорхой хувийг эрчим хүчний салбар эзэлсээр байгаа бөгөөд тухайлбал, Хөвсгөл аймгийн Эрдэнэбулган суманд Данийн Загсийн газрын тусламжаар УЦС байгуулах төсөлд 2001 онд нэг сая ам.долларын санхүүжилт хийснээр уг цахилгаан станц 2006 оны есдүгээр сард ашиглалтад оржээ. Цаашид манайх шиг нүүдлийн мал аж ахуй эрхэлдэг оронд нар, салхины эрчим хүчийг түлхүү ашиглах нь эдийн засгийн хувьд үр ашигтай тул шаардлагатай тоног төхөөрөмж, хөрөнгө оруулалтыг нэмэгдүүлэхэд Данийн тал туслахаар болж байгаа аж.

Энэ удаагийн айлчлал нь хоёр орны харилцаанд чухал хувь нэмэр оруулаад зогсохгүй зарим гэрээ хэлэлцээр байгуулж, бодит үр дүнгээ үзүүлж эхэлнэ гэдэгт Ханхүү итгэлтэй буйгаа семинарын үеэр мэдэгдлээ.

МОНЦАМЭ