Ерөнхий боловсролын сургуулиудын хичээл эхлэх мөч хаяанд тулчихаад байгаа энэ өдрүүдэд Архангайн олон сургуулийн барилгын засвар дуусаагүй, зарим нь эхлээ ч үгүй, эрдэмд тэмүүлсэн багачуудын урмыг хугалахад тулаад байгаа аж. Тухайлбал, аймгийн төвийн “Хүмүүн” цогцолбор нэгдүгээр сургуулийн барилгын засвар нь гүйцэтгэгч “Цагаан сүмбэр” ХХК-ийн хариуцлагагүйгээс сунжирчээ. Мөн Тариат, Хотонт сумын сургуулийн өргөтгөл, дотуур байрын барилгын тендерийг БСШУЯ-наас татан авч сураггүй болсноос энэ ондоо эхлэх найдвар тасарч байгаа бололтой. Хашаат, Хотонт, Цахир сумын сургуулийн халаалтыг шинэчлэх засвар хийх ажил одоо болтол шийдвэрлэгдээгүй байна. Энэ бүхэн орон нутгийн төр, захиргааны байгууллагын нэн хариуцлагагүй цалгар назгай байдлаас шууд шалтгаалжээ. Өнөө жилийн барилга засварын багавтар хөрөнгө оруулалттай ажлын тендер шалгаруулалтыг тухайн суманд нь хариуцуулсан нь барилгын мэргэжлийн компани байхгүй сумдад бүр ч хүндээр туссан бололтой. Ер нь УИХ-ын сонгуулийн дараа дээрээ учраа ололцохгүй байгааг дагаж дуурайх мэт орон нутгийн төр, захиргааны ихэнх удирдах ажилтан үүрэгт ажилдаа хайш яйш хандах болжээ. Аймаг, сумын ихэнх дарга нар амралтаа аваад ийш тийш одсоноос албан тушаалтан, түшмэдүүд нь ажлаа хийхгүй цаг нөхцөөн цалингаа хүртсээр суугааг хэрхэх вэ?

Аймгийн Багшийн коллежийн барилгын засвар хэдхэн хоногийн өмнө эхэлсэн, хэзээ дуусч, хэзээ нь хичээл эхлэхийг хэлж мэдэх хүн Архангайд л лав алга. Цахир сумын сургуулийн халаалтын зуухыг засварлах 130 сая төгрөгийн хөрөнгийн асуудлыг дөнгөж саяхан шийдвэрлэжээ. Оны эхний барилга засварын төлөвлөгөөнд орж ИТХ-ын хуралдаанаар баталсан асуудлын хэрэгжилт ийм байгааг ажил хариуцсан тодорхой хүний хариуцлагагүй, нэн арчаагүй байдалтай холбож үзэхээс өөр аргагүй. Орон нутгийн сонгууль ойртсон энэ өдрүүдэд аймгийн олонхи дарга ажлаа биш, сонгуульд яаж оролцохоо л бодож суугаа нь нууц биш. Хариуцлагагүйн “зуд” хааяагүй цалгар назгайг дагуулж, түүний хүйтэн хаялга хүүхэд багачуудыг зутрааж нэрмэх босгонд тулж очжээ.