Сууцны барилгыг эхлэн төлөвлөхдөө ашиглалтын нийт талбайг зөв тооцоолох ёстой. Нэг айлын сууцанд зочны, гал зуухны, ажлын өрөөнөөс гадна унтлагын өрөө 3 хүртэл байхад үндсэндээ хангалттай. Барилгын төсөвт өртөгийн хэмжээ, материалын сонголтоос хамаарч, 1м2 талбайн дундаж үнэ 90-300 мянган төгрөгт хэлбэлзэнэ. Төлөвлөсөн барилгын суурийн талбай, давхрын тооны үржвэрийг дээрхи 1м2-ын жишиг үнээр үржүүлж, барилгын ойролцоо өртөгийн тодорхойлно. Хэтэрхий олон догол, өнцөг булантай барилга барихаас зайлсхийх хэрэгтэй. Учир нь угсарч барихад хүндрэлтэйгээс гадна дулааны алдагдал их болж, цантах магадлал өндөртэй болдог. Хэт олон цонх төлөвлөх нь өрөөнд өрөөнд тавилганы орон зай, хана байхгүй болгоход нөлөөлдөг. Гол нь байшингийн ашиглалтын зардал хямд байх нөхцөлийг сонгох хэрэгтэй. Гол том цонхоо урд талдаа гаргаж, баруун зүүн талдаа цөөвтөр цонхтой, хойд талдаа цонхгүйгээр төлөвлөхийг эрмэлзээрэй. Урд талын цонхоор нарны тусгал удаан хугацаагаар туссанаар байгалын дулаан хангамж нэмэгдэн, хүйтний улиралд түлш хэмнэдэг ач тустай юм. Барилгынхаа байршлыг сонгохдоо нөмөр нөөлөгтэй, нарны тусгал саадгүй тусдаг газар сонгоорой.