Барилга, хот байгуулалтын салбарт хүч хөдөлмөр, сэтгэл оюунаа зориулж ирсэн үе үеийн барилгачид, барилгын байгууллагын ажилтан ажилчид Та бүхэнд Монгол Улсад барилгын салбар үүсэж хөгжсөний 82 жилийн ойн баярын мэндчилгээ дэвшүүлж аз жаргал, сайн сайхан бүхнийг хүсье!
        Бүтээн байгуулах эрч хүчний дуудлага болсон барилгачдын уламжлалт баяр энэ жилийн хувьд дэлхий нийтийн эв нэгдлийн их баяр болсон Олимпийн наадам болж, Монголын тамирчдаас олимпын хос аварга, хос мөнгөн медальтан төрсөн тэмдэглэлт өдрүүдийн баярын уухайтай түрлэг нэгдэн, залган тохиож байгаа нь  улам ч их урам зориг бадрааж,   утга учир нэмж байна. Мөн дөрвөн жилд хийсэн ажлаа дүгнэн харах, ирэх дөрвөн жилд хийх ажлаа төлөвлөн, зорилтоо тодорхойлох сонгуулийн жил тохиож байна.
        Өмнөх дөрвөн жилд “40000 орон сууц хөтөлбөр” хэрэгжүүлэх зорилтын хүрээнд орон сууцны олон барилга баригдаж, шинэ хийц материал машин механизмууд нэвтэрч, барилгын салбарын аж ахуйн нэгжүүдийн тоо, хүчин чадал нэмэгдэж байна.
Барилгын салбарын хууль эрх зүйн орчин ч сайжирч хууль дүрмүүд шинэчлэгдлээ.
Хэдийгээр барилгын салбарын хөрөнгө оруулалт жилээс жилд нэмэгдэж, бүтээн байгуулалтын  ажил эрчимжиж байгаа ч улс орны хувьд хөрөнгө оруулалтыг өөртөө шингээх чадвараа нэмгэдүүлэх нь тулгамдсан зорилт болон та бидний өмнө тавигдаж байна.
Үүний тулд барилгын материалын үйлдвэрлэлээ нэмэгдүүлж импортоо багасгах шаардлага тавигдаж байгаа. Энэ зорилтыг хэрэгжүүлэх эхний алхмууд хийгдэж “Барилгын материалын үйлдвэрлэлийг хөгжүүлэх мастер” төлөвлөгөө батлагдан, шинэ үйлдвэрүүд баригдаж байна.
        Барилгын материалын үйлдвэрлэл хөгжихийн хэрээр материалын чанарт өндөр шаардлага тавигдах болно.
Ирэх дөрвөн жилд гэр хорооллыг барилгажуулах, бүсийг төвүүдийг шинэчлэн байгуулах зорилтууд урган гарч байгаа. Энэ нь барилгын мэргэжилтэй ажилчин, инженер техникийн ажилтнуудын тоог нэмэгдүүлэх, мэргэжлийн ур чадварыг нь улам өсгөх мэргэжилтэй ажилчдын тогтвор суурьшилтай ажиллаж амьдрах хөдөлмөрийн баталгааг хангах талаар төрөөс явуулах бодлогодоо илүү анхааруулахыг сануулж байгаа билээ.
        Эдгээр зорилтуудыг Та бид хамтын хүчин чармайлт, нэгдмэл санаа зоригоороо хэрэгжүүлж чадна.
Монголын барилгачдын алдар суу улам бадран мандах болтугай.


                     БАРИЛГА, ХОТ БАЙГУУЛАЛТ, НИЙТИЙН АЖ АХУЙН
      ҮНДЭСНИЙ ТӨВИЙН ДАРГА                              Б.БЯМБАЖАВ