“Хулс” хоршоо нэртэйгээр анх байгуулагдсанаас хойш 15 жилийн хугацаанд нийт 28 инженер техникийн ажилтантай болтлоо өсөж өргөжин, ямар ч барилга байгууламжийн зургийг иж бүрнээр бие даан гүйцэтгэх хүчин чадал, бүрэлдэхүүнтэй болсон зураг төслийн “Хатанбаатар” ХХК өнгөрсөн онд СХД-ийн 10-р хороон дахь 38-р цэцэрлэгийн өргөтгөл, Өмнөговь аймаг дахь нүүрсний үйлдвэр, БГД-ийн 5-р хороон дахь иргэн Болорчимэг, Дашзэвэг нарын, БЗД дэх иргэн Артагийн, “МВС” ХХК-ийн захиалгат 5 давхар, “Голд констракшн” ХХК-ийн 7 давхар орон сууцууд, Архангай аймагт барих “Тайж трейд” ХХК-ийн мах боловсруулах үйлдвэр зэрэг 24 барилга байгууламжийн зураг төслийг гүйцэтгэсэн бол энэ онд 21-р зуун хотхоны үйлчилгээтэй 9 давхар орон сууны 21 барилга, “Ач үр” ХХК-ийн захиалгат 9 давхар орон сууцны барилга, “Гео сан” ХХК-ийн контор, үйлчилгээний барилга, Сэлэнгэ аймгийн Алтанбулаг сумын сургуулийн өргөтгөл зэрэг 15 барилга байгууламжийн зураг төслийг боловсруулаад байна.


Барилгын зураг төслийн чиглэлээр 8 жил ажиллах хугацаандаа нийт 300 гаруй барилга байгууламжийн зураг төслийг дангаар болон хамтарч гүйцэтгэсэн “Эрчим төсөл” ХХК  сүүлийн 2 жилд “Улаабаатар барилга” ХК-ийн үйлчилгээний барилга, Үндэсний бүтээмж хөгжлийн төв, Дорнод аймгийн 240 хүүхдийн сургууль, цэцэрлэг, “Жинди” ХХК-ийн үйлчилгээний төв, Дархан хотын “SOS” хүүхдийн хотхон, “Макс” ХХК-ийн орон сууц, офис, зочид буудал, худалдаа үйлчилгээний төв, Замын Үүдэд барих “Е-Транс” ХХК-ийн ачаа буулгах цогцолбор, “МАКС” группийн 120 айлын орон сууц, “Дунд Мандал” ХХК-ийн “Кристалл таун” хотхоны 537 айлын орон сууцны цогцолбор зэрэг 21 барилга байгууламжийн зураг төслийг иж бүрнээр, “HAPPY TOWN” хотхон, ИНЕГ-ын Радиолокатерийн барилга, “Хатан туул” орон сууцны цогцолбор, Буянт-Ухаа дахь оюутны хотхоны гадна шугам сүлжээ, Өмнөговь аймгийн 550 хүүхдийн хичээлийн байр зэрэг 42 барилга байгууламжийн инженерийн хангамжийн зургийг гүйцэтгэжээ. Инженер техникийн нийт 21 ажилтантай.


        Байгуулагдсанаасаа хойших 12 жилийн хугацаанд хэн бүхний мэдэх “Голомт хотхон”, “Санзай орон сууцны хотхон” зэрэг нийт 183 барилга байгууламжийн зургийг гүйцэтгэж, тэдгээрийн 109 нь баригдаж ашиглалтанд орсон үзүүлэлттэй байгаа “Ти энд Жи” ХХК  сүүлийн жилүүдэд гадаадын зураг төслийн байгууллагуудтай хамтын ажиллагаагаа өрөгжүүлж Малайзийн компанийн захиалгаар Улаанбаатар ротод баригдах хямд өртөгтэй 1000 айлын орон сууцны төсөл, БНХАУ-ын “Чайна интернэшнл дизайн инженеринг” компанитай хамтран Улаанбаатар хотод баригдах 5000 хүний суудалтай Спорт цогцолборын зураг төсөл, Малайз улсын “ARX-3” компанитай хамтран Улаанбаатар хотод баригдах “Holiday INN” зочид буудлын барилгын зураг төслүүд дээр хамтран ажиллаад байна. Зургийн групптээ 20 орчим инженер техникийн ажилтантай тус компани сүүлийн 1 жилд 18 бүтээл дээр ажиллаж 250 сая төгрөгийн зураг төслийн ажил гүйцэтгэжээ.

        Монгол Улсын барилгын материалын томоохон үйлдвэрүүдийн нэг Хөтөлийн “Цемент шохой” ХК сүүлийн жилүүдэд үйлдвэрлэлтээ тогтмол нэмэгдүүлж өнгөрсөн онд 150097 тонн цемент үйлдвэрлэсэн бол энэ онд 180000 тонныг үйлдвэрлэх зорилт тавин ажиллаж байна.
        Тус үйлдвэр цементийн эргэх зуухны 1-р гунамын техник шинэчлэлт, сэргээн засварлалтын томоохон төслийг хэрэгжүүлж байгаагийн зэрэгцээ бүтээгдэхүүний нэр төрлийг нэмэгдүүлж, чанарыг сайжруулан 500 маркийн цементийг үйлдвэрлэн  “тохирлын гэрчилгээ” авч, “Пуццолон портланд цемент” гэсэн шинэ нэр төрлийн эхний бүтээгдэхүүнээ хэрэглэгчдэд хүргэн, шохойн чанарыг өнгөрсөн оныхоос 10 хувь дээшлүүлсэн амжилтаар үйлдвэрийнхээ 25 жилийн ойтой золгож байна.

        Хоёр дахь удаагаа оны шилдэг аж ахуйн нэгжээр шалгарч байгаа “Монгол базальт” ХХК өнгөрсөн онд барилгын дулаалгын шилдэг материал BASALTWOOL нэрийн бүтээгдэхүүнээ үйлдвэрлэж эхлэсэн бол энэ онд технологио улам боловсронгуй болгож хайлах зуухаа шинэчлэн, ажлын байр, ажилчдынхаа хөдөлмөрийн нөхцлийг сайжруулахад нэлээд хэмжээний хөрөнгө оруулалт хийж, бүтээгдэхүүний үйлдвэрлэлээ өнгөрсөн оныхоос 140 хувь нэмэгдүүлсэн байна.    


        Улаанбаатар Хархорины гурилын үйлдвэрийн элеваторын барилгын өргөтгөл, Булигарын заводын шинэчлэл, Том ширний үйлдвэрийн өргөтгөл, 3,4-р цахилгаан станцын зуухны болон халуун хүйтэн хий дамжуулах хоолойн шинэчлэлийн ажлуудын төмөр хийцүүд, Улаанбаатар-Эрдэнэтийн өндөр хүчдэлийн шугамын цамхагууд гэх зэрэг улс орны бүтээн байгуулалтад шаардагдаж байгаа төмөр хийцүүдийг үйлдвэрлэн нийлүүлэхэд оролцож ирсэн “Ган хийц” ХХК өнгөрсөн онд 66 захиалагчийн захиалгаар 1 тэрбум гаруй төгрөгийн төрөл бүрийн ган хийцийг үйлдвэрлэн нийлүүлжээ.
        Тэрчлэн өнгөрсөн оноос энэ оны 8 дугаар сар хүртэлх хугацаанд 104 мянган метр квадрат сэндвич хавтан үйлдвэрлэсэн дотоодын нийт хэрэгцээний 50 хувийг хангаад байна. Мөн хугацаанд 65987 ширхэг төмөр бетон шон үйлдвэрлэн нийлүүлсэн байна.
 


        Барилгын үйлдвэрлэлд чанарын удирдлагын тогтолцоог анх нэвтрүүлсэн, оны шилдгээр гурав дахь удаагаа шалгарч байгаа "Бридж констракшн" ХХК  өнгөрсөн онд Монгол Японы засгийн газрын хэлэлцээрийн дагуу “Нийслэлийн бага, дунд боловсролыг дэмжих төсөл”- ийн хүрээнд нийслэлийн таван сургуулийн хичээлийн байрны өргөтгөл, СЭЗДСургуулийн өргөтгөлийн барилгын ажлыг дуусгаж чанарын өндөр үнэлгээтэйгээр хүлээлгэж өгсөн бол, одоо мөн төслийн хүрээнд Багануур, Улаанбаатар хотын ерөнхий боловсролын 3 сургуулийн хичээлийн байрны өргөтгөл, 32 айлын орон сууц, Бохир усны Туул-1 коллекторын ажил, Улаанбаатар хотын хог хаягдлын менежментийг сайжруулах төслийн хүрээнд барилга, зам талбай, далангийн ажлуудыг гүйцэтгэж байгаа билээ.
    Нийт 328 ажиллагсадтайгаас Инженер техникийн 35 ажилтан, 158 мэргэжилтэй ажилчин тус компанид ажилладаг юм.

4-р Цахилгаан станцыг шинэчлэх төслийн хүрээнд Зуухан цехийн тээрмийн суурийн ажил зэрэг томоохон барилга байгууламжийн ажлыг гүйцэтгэж ирсэн “Дельта констракшн” ХХК өнгөрсөн онд “Корпорет” /Corporate/ зочид буудлын төмөр бетон, “Гермес Тесунг” ХХК-ийн 15 давхар “Твин парк” орон сууцны цогцолборын  арагт бүтээцийн ажлуудыг хийж дуусгасан бол энэ онд иргэн Батжаргал Тунгалаг нарын 16 давхар орон сууцны барилгын арагт бүцээцийн ажил, “Чилагү” ХХК-ийн оффисын барилгуудыг дуусгаж, “Дорнод Гурил” ХХК-ийн захиалгат 55 айлын орон сууцны 12 давхар барилга, иргэн Тогтохбаярын 10 давхар орон сууц, “Баянгол Фүүд” ХХК-ийн үйлчилгээний барилга,  “Дунд Мандал” ХХК-ийн 536 айлын орон сууцны “Кристал таун” хотхоны барилгууд дээр ажиллаж байна.
Тус компанид инженер техникийн ажилтан  15, мэргэжилтэй  ажилчин 250-тай 


Орон сууцны барилгаар дагнан гаршиж байгаа "Орчлон констракшн" ХХК Хан-уул дүүргийн 1-р хорооны нутаг дэвсгэрт баригдаж буй “Шинэ дүр төрх” хотхон, Сонгино хайрхан дүүргийн 5-р хорооны нутаг дэвсгэрт баригдаж буй залуу гэр бүлд зориулсан орон сууцны “Орчлон хороолол”-ын барилгууд дээр ажиллаж байна. Мөн БГД-ийн 6-р хорооны нутаг дэвсгэрт 160 айлын орон сууц бүхий “Эрдмийн өргөө” цогцолборын ажлыг эхлээд байгаа юм. Тус компани 500 шахам ажиллагсадтайгаас Инженер техникийн 12 ажилтантай.

2003 онд шилдэг 10 аж ахуйн нэгжээр шалгарч байсан "Мон Тед" ХХК өнгөрсөн онд Чингэлтэй уул дүүргийн 3-р хорооны нутаг дэвсгэрт 9-12 давхар бүхий 240 айлын орон сууцны барилгыг барьж дуусган ашиглалтанд өгсөн. Одоо БГД-ийн 17-р хорооны нутаг дэвсгэрт 180 айлын орон сууц үйлчилгээний барилгыг барьж байна.
Тус компани 200 гаруй ажиллагсад, 17 инженер техникийн ажилтантай, өөртөө мужаан, арматурын цех, авто засварын газартай. Дагнасан сантехникийн болон холбоо, цахилгааны бригадуудтай.