“Forbes” сэтгүүл баячуудын ээлжит жагсаалтаа гаргаад удаагүй байна. Өнгөрсөн жил дэлхийд 768 тэрбумтан байсан бол одоо энэ тоо 946-д хүрчээ. Тус жагсаалтыг “Microsoft” компанийг үндэслэгчдийн нэг Билл Гейтс сүүлийн 13 жил дараалан тэргүүлж байна.
Азийн тэргүүн баян Ли Ка Шинийг хэвлэлийнхэн “Сянганы супермен” гэж нэрлэх нь бий. “Forbes” сэтгүүлийн тоцоолсноор түүний хөрөнгө 23 тэрбум ам.долларт хүрсэн бөгөөд гол хөрөнгө нь “Hutchison Whampoa” компанид нь төвлөрдөг. Тус ком пани нь үл хөдлөх хөрөнгө, зочид буудлын бизнес, эрчим хүч, цахилгаан холбоо, хөрөнгө оруулалт гэсэн таван үндсэн чиглэлээр үйл ажиллагаагаа явуулдаг. Ирээдүйн тэрбумтан анхныхаа юаныг цагны оосор зарж олж байжээ. Хожим нь 1950 онд хиймэл цэцэг үйлдвэрлэдэг жижиг үйлдвэр нээж нилээдгүй мөнгө хуримтлуулж чадсан байна. Энэ мөнгө нь түүнд үл хөдлөх хөрөнгийн бизнес эрхлэх боломж олгож улмаар хэдэн тэрбум болж арвижсан ажээ. Өмнө нь хуванцар цэцгийн жижигхэн үйлдвэр байсан компани нь одоо “Cheung Kong Holdings” нэртэй асар том нэгдэл болж хүрээгээ тэлжээ. Ли Ка Шины хайртай “Hutchison Whampoa'’-ны зэрэгцээ “Cheung Kong Holdings” нь түүний гол хөрөнго болж байгаа бөгөөд дэлхийн 42 оронд салбартай эдгээр компаниуд нь барилга, үл хөдлөх, холбоо харилцаа гээд олон салбарт үйл ажиллагаагаа явуулж байна. Азийн хамгийн баян бас нөлөө бүхий бизнесмен тэрбээр 1928 оны 7 сарын 29-нд Гуандан мужийн Чаожоу хотод багшийн гэр бүлд төржээ. Түүнийг 11 настай байхад бусад олон хятад хүмүүсийн адил түүний эцэг нь Японы армиас дүрвэн Хонконг руу нүүв. Английн эрх мэдэлд байсан Хонконгд очоод байдал арай дээрдэж Ли сургуульд явж эхэлсэн ч түүнийг 14-тэйд нь эцэг нь зуурдаар нас барсан тул тэрбээр амьдралаа авч явахын тулд сургуулиасаа гарч хар ажил хийж эхэлжээ. Ажиллахын хажуугаар оройн цагаар сурсаар дунд боловсролын гэрчилгээтэй болсон байна. Түүний намтрыг цөөн үгээр хэлэхэд үлгэртэй төстэй, яг л үлгэрт гардаг шиг ядуу мөртлөө хичээнгүй хөдөлмөрч хүү гэнэт их баялгийн эзэн болдогтой адил. 1970-аад оны дунд үе гэхэд Ли Ка Шин Хонконгийн хамгийн баян хүн хэмээн тооцогдох болжээ. Энэ үед тэрбээр Хонконгдоо тэргүүлэх хөрөнгө оруулалтын “Cheung Kong Holdings”-ын эзэн болсон байлаа. Түүний дараачийн хийсэн алхам нь “Hutchison Whampoa Limited” болов. 1979 онд тэрбээр энэ корпорацийг мэдэлдээ авсан юм. Тухайн үедээ энэ нь хятад хүний гарт Хонконгийн улсын хэмжээний томоохон үйлдвэр орсон анхны үйл явдалд тооцогдож байсан аж. Гэвч бага байхдаа Хонконгд цагаачилж ирсэн, аажим аажмаар хүлээн зөвшөөрөгдсөн Ли Ка Шины энэ алхам нийгэмд тийм ч цочроо үүсгэсэнгүй. Харин 1980-аад оны эхээр “Hutchison Whampoa Limited'’-ын удирдлага шинэ стратеги сонгож авсан нь гайхшрал төрүүлж байв. Ли Ка Шин хай-технологийг нэвтрүүлэх тал дээр илүү анхаарал хандуулж, үйлдвэрүүдээ техник тоног төхөөрөмжөөр хангахад зориулан сая саяар нь мөнгө хаяж эхлэв. Мөн Лигийн захирамжаар “Hutchison Whampoa Limited’-ын дэргэд “Hutchison Telecom” хэмээх салбар компани нээснээр мэдээлэл, харилцаа холбооны зах зээлд бас нэгэн хүчтэй өрсөлдөгч болж оржээ. 1980-аад оны үед тэрбээр Дэн Сяо Пины засгийн газартай нягт холбоотой ажиллаж байсан нь тухайн үедээ нууц байсан аж. Мөн 1990-ээд онд АНУ-ын тагнуулын төв алба түүнийг Хятадын тусгай албадуудтай хамтран ажилласан, Хятадын зах зээлд өөрийн концернийн нөлөөг нэмэгдүүлэхийн тулд барууны өндөр технологийг Хятадад хууль бусаар оруулж ирсэн хэрэгт буруутгаж байсан юм. Тэрбумтан Хятадад ийнхүү тал засч байсан нь ч талаар өнгөрсөнгүй. Хонконг 1997 онд Хятадын “онцгой эрхт засаг захиргааны хэсэг” болоход Ли Кa Шин өөрийн бизнесээ Хятадын зах зээл дээр чөлөөтэй явуулах нөхцлийг хэдийнээ бүрдүүлсэн байлаа. Харин одоо 70 гарсан тэрбумтны орыг хэн залгах вэ гэдэг асуулт үүсээд байна. Тэрбээр хоёр хүүтэй. “Cheung Kong” компанийнхаа гүйцэтгэх захирлаар 41 настай хүү Виктор Лигээ томилоод байгаа. Гэвч хөрөнгө оруулагчид, хувь нийлүүлэгчид нь Ли Ка Шины ззэнт гүрнийг хүүд нь итгэж өгөх эсэх нь эргэлзээтэй. Виктор Ли уг нь арван настайгаасаа эхлэн эцгийнхээ компаний хуралдаан бүр дээр сууж бизнесийн ухаанд суралцаж ирсэн. Коллежийн дараагаар Хонконгийн “St, Paul” их сургууль, Калифорний Стэнфордын их сургуулийг төгссөн. Тэрбээр 1989 онд Хонконгод буцаж ирэн эцэгтээ хүчин зүтгэх болжээ. Улмаар таван жилийн дараагаар “Cheung Kong” компанийн захирлын зөвлөлд орсон байна. Гэвч дээрэмчид түүнийг 32 настайд нь эцгээс нь мөнгө салгах зорилгоор барьцаалсан юм. Энэ явдлын дараагаар тэрбээр өөрчлөгдөж, чимээгүй, идэвхгүй, зожиг хүн болж хувирсан ажээ.
Харин Ли Ка Шины бага хүү Ричард Ли сүүлийн долоон жилийн турш “Hutchison Whampoa” компанийн захирлын албыг хашиж байгаа. Гэвч 2000 онд Хонконгийн утасны томоохон компанийг худалдан авсны дараагаар тэрбээр гэр бүлийн бизнесээсээ нилээд хөндийрсөн гэнэ.