2004 оноос баригдаж эхэлсэн Burj Dubai цамхаг 2007 оны 4 сард 512 метрийн өндөрт хүрснээр Тайваний Taipei 101 цамхагаас дэлхийн хамгийн өндөр гэсэн тодотголыг нь булаан авчээ.

Emaar компани өнгөрөгч дөрөвдүгээр сард цамхагийг 629 метр өндөртэй болсныг зарласнаар АНУ-д байрладаг 629 метр өндөртэй KVLY-TV антеннаас илүү гарч манай гараг дээрхи хүний гараар бүтсэн хамгийн өндөр байгууламж болжээ.

Яг хэдэн метр өндөртэй цамхаг баригдах нь нууцлагдмал хэвээр байгаа боловч эцэстээ 900 метрийн өндөртэй болно гэсэн цуурхал байгаа аж.

Ажил хэрэгч завгүй хот улсад орших тус барилгыг 2008 оны сүүлээр ашиглалтанд өгөхөөр байсан ч ирэх жилийн 9 сар хүртэл хойшлуулахаар болсноо өнгөрөгч 6 сард Emaar компани мэдэгдсэн байна.

Арабын Нэгдсэн Эмирт улсын Arabtec Construction LLC, Өмнөд Солонгосын Samsung, Бельгийн Besix нарын хамтарсан консорциум энэхүү цамхагийг барьж байгаа юм байна.

Дубайд хэрэгжүүлэхээр төлөвлөгдсөн хэд хэдэн төслүүд барилгын материалын хомсдол, мэргэжилтэй ажилчид дутагдсанаас болоод цуцлагдахад хүрээд байгаа гэнэ.

Бэлтгэсэн Э.Алтангэрэл