Барилга МН

Монгол улсын бүсчилсэн хөгжлийн стратегитай нутаг дэвсгэрийнхээ эдийн засгийн, нийгмийн хөгжил, хот байгуулалтын төлвийг уялдуулах, нийслэлийн төвийн дүүргүүийн нягтралыг сааруулах, улмаар үйлдвэрлэлийн бүс болгох зорилгоор нийслэлийн Налайх, Багануур, Багахангай дүүргийг үйлдвэрийн бүс болгохоор төлөвлөөд байгаа юм.

Үүнтэй холбогдуулан Нийслэлийн Иргэдийн Төлөөлөгчдийн Хурал, нийслэлийн Засаг даргын Тамгын газрын зүгээс хэд хэдэн ажлыг зохион байгуулаад байна. Энэ талаар Нийслэлийн Газрын албаны дарга Ц. Сандуйгаас тодрууллаа. Улаанбаатар хотыг эрүүл ахуй, ариун цэврийн шаардлагад нийцсэн улсын нийслэл болгох үүднээс төмөрлөгийн үйлдвэрүүд болон хөдөө орон нутгаас орж ирж байгаа боловсруулаагүй түүхий эд, мах, махан бүтээгдэхүүнийг алслагдсан гурван дүүрэгт төвлөрүүлэн боловсруулж дараа нь нийслэлд нэвтрүүлэхээр шийдвэрлэсэн. Мөн нийслэлийн газар зохион байгуулалтын болон хотын ерөнхий төлөвлөгөөний дагуу гурван дүүргийн төлөвлөгөөг захиалан хийлгэж үйлдвэрийн бүсчлэлийг дүүрэг тус бүрээр тогтоогоод байна. Тодруулбал төлөвлөлтөөр Багахангай дүүрэгт шинээр 2500 га, Багануур дүүрэгт 500 га, Налайх дүүрэгт 710 га газруудыг үйлдвэрлэлтийн зориулалтаар ашиглуулах боломжтой юм.