Сүүлийн таван жил тасралтгүй төрийн албанд үр бүтээлтэй ажиллагсдад орон сууцны хөнгөлөлт үзүүлэх журам хэрэгжиж эхлэх гэж байна.

Барилга, хот байгуулалт, ХЗДХ-ийн сайд нарын хамтран баталсан уг журамд төрийн албан хаагч ажилласан жилээс гадна сар бүр зээл болон зээлийн хүүг өрхийн орлогын 40 хүртэлх хувиар төлөх боломжтой, орон сууцны үнийн дүнгийн 25 хувийг урьдчилж төлөх чадвартай байх болзолтой юм.

"40 мянган айлын орон сууц" хөтөлбөрийн хүрээнд хэрэгжих уг хөнгөлөлтөд хамрагдах хүсэлтэй иргэд урьд нь улсаас байр авч байгаагүй байхаас гадна орон сууц зайлшгүй авах шаардлагаа нотолж, албан газраараа дамжуулан арилжааны банк болон Орон сууцны санхүүжилтын корпорацийн урт хугацааны зээлд хамрагдах юм.

Засгийн газрын бондын хөрөнгөөр барьсан юм уу, эсвэл зах зээлээс орон сууц худалдан авах нөхцөлд дээрх хөнгөлөлтийг бас эдлэх юм байна. Хэрэв бондын хөрөнгөөр барих орон сууц худалдан авахыг хүсвэл барилгын ажлын гүйцэтгэл 50 хувьд хүрсэн үед захиалга авч эхлэхээр уг журамд тусгажээ. Манай улсын төрийн албанд 150 мянга гаруй хүн хүчин зүтгэдэг байна.