УИХ-ын Төрийн байгуулалтын байнгын хороо өчигдөр хуралдаж, Хот байгуулалтын тухай хуулийн төслийг хэлэлцэв. 1998 онд ийм хууль батлагдсан бөгөөд түүнийг шинэчлэн найруулж, УИХ-ын намрын чуулганы үед өргөн барьсан аж.

Хот байгуулалтад замбараагүй хандсанаас үүдэж олон зөрчил гардаг. Энэ нь ялангуяа газар олголттой холбоотой. Гэтэл хотыг хөгжүүлэх ерөнхий төлөвлөгөө хуульчлаагүй, хуулиа  мөрдөх эрх зүйн орчин бүрдээгүй байгаг энэ хуулиар зохицуулахыг зорьжээ. Орон нутагт хот байгуулалтын асуудал хариуцсан төрийн захиргааны байгууллагатай болох талаар төсөлд тусгасан хэрнээ шаардагдах хөрөнгөний тооцоог хийгээгүй, хот, тосгон гэдэг ойлголтоо нарийвчлаагүй зэрэг олон дутагдал байгааг гишүүд шүүмжиллээ. Тиймээс орон сууцнуудын дунд байдаг хүүхдийн тоглоомын болон сургуулийн талбай, нийтийн эзэмшил газарт барилга барих зөвшөөрөл олгохгүй байх, хот байгуулалтыг ногоон байгууламж, орон сууцны дундах зам зэрэгтэй нь цогцоор тусгах талаар заалт оруулах санал гарав.

Гишүүд хуулийн төслийг УИХ-аар хэлэлцэх нь зүйтэй хэмээн санал нэгдсэн ч Байнгын хорооноос ажлын хэсэг гарган дахин сайн боловсруулахыг төсөл санаачлагчдад даалгав.