Төв аймгийн Сэргэлэн сумын нутаг, Хөшигтийн хөндийд Япон Улсын хөнгөлөлттэй зээлээр нисэх онгоцны буудал барих төслийг УИХ-ын Эдийн засгийн байнгын хороо дэмжив.

                Японы Засгийн газраас олго 28 тэрбум 807 сая иен буюу 272 сая ам.доллар нь 40 жилийн хугацаатай, жилийн 1,2 хувийн хүүтэй, 2018-2048 онд эргэн төлөгдөх нөхцөлтэй аж. Зээлийн хүүг эхний 10 жилд чөлөөлөх юм байна.

                Хөшигтийн хөндийд баригдах шинэ олон улсын буудал нь Чингисхаан буудлаас дөрөв дахин илүү хүчин чадалтай, жилд 1,6-1,8 сая зорчигчид үйлчилж, 10400 орчим орон нутгийн, 7700 гаруй олон улсын нислэг үйлдэх боломжтой юм.

                Барилгын ажлыг 2011 оноос эхлүүлж 2015 онд дуусгахаар төлөвлөжээ. Энэ онд багтаан зээлийн хэлэлцээрийг эцэслэн байгуулж ирэх онд тендер зарлан гүйцэтгэгчийг сонгоно гэж ЗТАЖ-ын сайд Р.Раш хуралдаанд мэдээллээ.

                Гишүүд хэлэлцээрийн гүйцэтгэл, чанарын үзүүлэлт, үе шат зэргийг сайтар анхаарч хугацаанд нь хэрэгжүүлэхийг сануулаад 100 хувийн саналаар Монгол Улсын засгийн газар, Японы Олон улсын хамтын ажиллагааны банк хооронд байгуулах зээлийн гэрээг сайшаав.

МОНЦАМЭ