УИХ-ын Эдийн засгийн байнгын хороо газар өмчлүүлэх тухай хуулийн төслийг дахин хойшлууллаа.

                Газар өмчлөлийн хугацааг дөрвөн жилээр сунгахаар Засгийн газар болон Д.Ганхуяг нарын хэсэг гишүүний өргөн барьсан хоёр хуулийн төслийг хаврын чуулган эхэлсэн өдрөөс хэлэлцэхээр яригдсан ч ийнхүү гурав дахиа хойшлогдож байна.

                Байнгын хорооны хуралдаан дээр энэ хуулийг хэлэлцэж батлах ёстой гэдгийг гишүүд дуу нэгтэй дэмжиж байсан. Гэсэн ч УИХ-ын гишүүн Д.Ганхуяг нарын хуулийн төсөлд газрыг иргэн бүрт өмчлүүлэх заалт оруулах гэж байгаа болохоор Т.Очирхүү, Л.Пүрэвдорж нарын зарим гишүүн нэлээд нарийн судалгаатай байж хэлэлцэх хэрэгтэй гэж байгаа юм. Тэд, ямар хэмжээний газар, хаана өгөх , өмнө нь өгсөн хүмүүстээ эргэж яаж үйлчлэх вэ гэсэн олон асуудлыг тодруулах хэрэгтэй гээд хуулийн төслийг хойшлуулах горимын санал гаргасныг гишүүдийн олонхи нь дэмжлээ.

                Хуралдааны үеэр байнгын хорооны дарга Д.Ганхуяг, олон удаа хойшлогдвол энэ чуулганы хугацаанд амжихгүй болох гээд байна. Тэгээд ч хот болон Газрын харилцаа, геодези зураг зүйн газраас судалгаа ирүүлсэн байгаа гэсэн тайлбар хэлсэн ч Т.Очирхүү гишүүн горимын саналаа өөрчилсөнгүй. Мөн Д.Одхүү, А.Мурат нарын гишүүн хэлэлцэх эсэхээ шийдчихээд дараа нь нарийн тодруулах асуудлаа ярилцая гэсэн нь ч бас дэмжигдсэнгүй.

                2003 оны тавдугаар сарын нэгнээс хэрэгжиж эхэлсэн Монгол Улсын иргэнд газар өмчлүүлэх тухай хуулийн хугацаа 2005 онд дуусч нэг удаа сунгасан. Энэ сунгасан хугацаа нь ирэх тавдугаар сарын нэгэнд буюу долоо хоногийн дараа дуусах юм.