Навсгар, нэвсгэр автобусны зогсоолууд нийслэлийн өнгө төрхийг гутаах болоод удаж байна. Хотын төвийн хэдэн автобусны зогсоол л гайгүйхэн дүртэй болохоос биш зах руугаа зогсоол уу, хогийн овоо юу гэдэг нь ялгагдахгүй байх жишээтэй.
Тиймээс ч нийслэлийн Засаг дарга бөгөөд Улаанбаатар хотын захирагч Ц.Батбаяр өнгөрсөн дөрөвдүгээр сард нийтийн зорчигч тээврийн үйлчилгээний автобусны зогсоолын талаар авах зарим арга хэмжээний тухай 140 дүгээр захирамжийг гаргажээ. Уг захирамжийн дагуу нийслэлийн төвийн автобусны зогсоолуудыг шинэчлэн, тохижуулах учиртай. Энэ ажил ямар шатанд хэрэгжиж байгаа талаар нийслэлийн Нийтийн тээврийн газрын мэргэжилтэн Б.Хишигдоржоос тодрууллаа.

-Өнгөрсөн дөрөвдүгээр сард нийслэлийн Засаг даргын 140 тоот захирамж гарчээ. Энэ захирамжийн биелэлт ямар байна вэ?
-Захирамжийн дагуу автобусны зогсоолуудыг шинэчлэн, тохижуулахад загвар гаргах ажлыг нийслэлийн Газрын албанаас НБХБГ-ын дарга Н.Нацагдоржид даалгасан. Одоогоор Хот тохижилт, Эрдэм шинжилгээний зураг төслийн хүрээлэнгээс автобусны зогсоолын хоёр ч загварын зураг төслийг гаргаж, батлуулаад байна. Үүнд автобусны зогсоолуудыг хотын төвийн, дунд хэсгийн, захын гэж ангилж байгаа. Энэ дагуу тус тусад нь зориулалтын зогсоол болгон төвхнүүлэх юм.

-Автобусны нэг зогсоол хэчнээн төгрөгөөр өнгөө өөрчлөх вэ? Хөрөнгийг хаанаас гаргах бол?
-Ер нь манай автобусны зогсоолууд цементэн ханатай, хүнд материалаар барьсан байдаг. Үүнийг шинэчлэхэд их хөрөнгө шаардагдана. Харин шинэчлэн тохижуулах зогсоолуудыг хөнгөн чанарын материал ашиглан хийхээр төлөвлөсөн. Тухайлбал, хаашаа ч нүүлгэж болохуйц, зөөврийн шаардлагыг хангасан байх ёстой. Ийм автобусны зогсоолыг хийхэд гурван сая орчим төгрөг шаардлагатай. Энэчлэн автобусны зогсоолуудад суудал, хогийн сав, хаяг, чиглэл, маршрутын самбар байрлуулах зэргээр авч үзвэл бараг дөрвөн сая орчим төгрөг гаргах хэрэгтэй болж байна. Нийслэлийн Засаг даргын захирамжид энэ ажилд зарцуулагдах хөрөнгийг гадаад, дотоодын байгууллагуудад хандан гэрээний үндсэн дээр гүйцэтгүүлэхээр заасан байгаа. Ингэснээр тэдгээр гадаад дотоодын байгууллагууд нь гаргасан хөрөнгөө зогсоолоос олох ашгаар нөхөх юм. Ер нь манайд нийт 530 гаруй автобусны зогсоол байдаг.

-Баяр наадмын өмнө автобусны 30 зогсоолыг шинэчлэн тохижуулж дуусгана гэж байсан?
-Уг нь Үндэсний баяр наадмын өмнө автобусны 30 зогсоолыг шинэчлэн тохижуулах даалгаварыг нийслэлийн Засаг даргаас өгсөн. Гэвч автобусны зогсоол орчмын айл өрхүүд нүүдэггүй, газраа чөлөөлж өгдөггүйгээс энэ ажил их удааширч байна. Бид зарим нэг буудлыг шинэчлэн засварлах гэж оролдож үзсэн. Гэсэн ч зогсоол орчмын айл өрхүүдийн эсэргүүцэлтэй тулгарч энэ ажил хойшлогдсоор байгаа юм.