“Дэлхийн чанарыг монголд” уриан доор 2008 оны 8-р сарын 22-с 26-ны өдрүүдэд “Барилга Экспо-2008” Олон улсын барилгын үзэсгэлэн яармаг Мишээл Экспо төвд зохион байгуулагдах гэж байна. Үзэсгэлэнд нэг зуу гаруй аж ахуйн нэгж, албан байгууллага оролцоно. Тус үзэсгэлэнгийн гол зорилго нь Дэлхийн шилдэг бараа бүтээгдэхүүнийг монголдоо нэвтрүүлэх, түүгээр зогсохгүй чанар стандартад нийцсэн, хэрэглэгчийн эрэлт хэрэгцээнд тулгуурласан шинэ барилга орон сууц, барилгын материал, тоног төхөөрөмжийг олон нийтэд таниулах, иргэдэд амины орон сууц барих, инженер техникийн шийдлийг таниулах, мөн гадаад дотоодын байгууллага, барилга угсралтын компани, барилгын материал үйлдвэрлэгч, худалдаалагчдын хамтын ажиллагааг бэхжүүлэх харилцаа холбоо тогтооход нь туслах зорилготой. Үзэсгэлэнг: Барилга Хот Байгуулалтын Яам, Монголын Барилгачдын нэгдсэн холбоо, Barilga.mn Барилгын Зөвлөгөө Мэдээллийн төв, Барилга Хот Байгуулалтын Нийтийн Аж Ахуйн Үндэсний Төв, Мишээл экспо төв гэсэн байгууллагууд зохион байгуулна.

Үзэсгэлэнд оролцогчиддоо зориулан зохион байгуулагч талаас 2008 оны 8 сарын 14-нд “Corporate” зочид буудалд үзэсгэлэнд оролцогчдод зориулан уулзалт семинар зохион байгууллаа. Уг семинараар үзэсгэлэнд хэрхэн оролцох тухай зөвлөмж, хөтөлбөрийн талаар дэлгэрэнгүй мэдээлэл өглөө. Тус уулзалтанд 70 гаруй аж ахуйн нэгжийн төлөөлөгчид идэвхитэй оролцсон ба тэд хоорондоо санал бодлоо чөлөөтэй илэрхийлж байлаа. Үзэсгэлэнд оролцогч байгууллагуудад туслах зорилгоор өөрсдийн мэргэжлийн ур чадвар, туршлагадаа тулгуурлан мэргэжлийн дизайнерууд павилионы  тохижилт, хүмүүсийн анхаарлыг татахуйц үзэмжтэй байх ажлыг цогцоор нь хийж гүйцэтгэх тал дээр хамтран ажиллах юм.