Хотын захирагчийн албанд орон сууц хүсэгчдийн шийдвэрлэгдээгүй 8114 өргөдөл нэгээс 40 гаруй жил хадгалагдаж байдаг аж.
Өргөдөлийн эзэд элдэв амлалт хууралтанд залхаж гүйцээд "Орон сууц хүсэгчдийн түр хороо" байгуулан МоАЧХ-нд ханджээ. Байрны өргөдөл өгсөн цагаас хойш 43 жил Хотын захиргааг сахиж байгаа Ц.Одсүрэн, 28 жил хүлээж байгаа есөн хүүхдийн эх Б.Цэрэндулам, насаараа ЗГХЭГ-т ажиллаад тэтгэвэртээ гарсан Д.Ванжаа, 100 настай ээж нь ерөнхийлөгчөөс байр хүсээд түүнийгээ хүлээж чадаагүй нас эцэслэсэн хөгшиний охин Г.Ирина, хуульч, эмч, багш гээд залуу насандаа улсынхаа төлөө зүтгэж гавьяаныхаа амралтанд гарсан ахмад буурлууд он удаан жил байр хүлээж өөрийн гэсэн орон гэргүйн зовлонгоо хэвлэлийнхэнд дэлгэлээ.
Тэд сэтгүүлчдэд Хотын захиргааны тав зургаан үеийн дарга нарыг дамжсан ном болтлоо зузаарсан өргөдөлөө үзүүлсэн юм. УИХ-д гарах гэж хоосон амлаж баахан өргөдөл бичүүлж аваад гарсан хойноо бултдаг гишүүдтэй хариуцлага тооцно, дахин сонгуульд гаргахгүй. Тэтгэврийн хамгийн доод хэмжээгээр амьдралаа зогоож явдаг бидний хувьд байр худалдаж авна гэдэг бодохын ч хэрэггүй. Алтыг нь аваад авдрыг нь хаядаг хаанахын ёс вэ гэх зэргээр гомдол цөхрөлөө барсан буурлууд амь уралдан ярьсан юм.
"Орон сууц хүсэгчдийн түр хороо"-ныхон асуудлаа шийдвэрлүүлэхээр тэмцлийн хурц хэлбэрийг сонгоно. Хүлээж цөхөрлөө хэмээн мэдэгдлээ.