Монгол Улсын Засгийн газар, НҮБ-ын Хөгжлийн хөтөлбөрөөс Дулааны хэмнэлттэй хувийн орон сууцыг зах зээлд нэвтрүүлэх МОН/99/Ж35 төслийг 2001 оноос хэрэгжүүлж эхэлсэн билээ. Энэ сарын эцсээр дуусгавар болгож байгаатай холбогдуулан тус төслөөс хэвлэлийн бага хурал хийлгэж ажлынхаа үр дүнг тайлагнав.

Уг төсөл нь хувийн орон сууцны барилгын салбарт дулааны хэмнэлтийн технологи нэвтрүүлж, эрчим хүчний хэрэглээг багасгах замаар агаарын бохирдлыг багасгах, энэ талаар мэргэжлийн хүмүүс болон ард иргэдэд сургалт сурталчилгаа явуулах, банкны шалгуур хангасан иргэдэд дулааны хэмнэлттэй орон сууцны өртгийн 50 хүртэлх хувийг санхүүжүүлэх зээл олгоход зуучлах зэрэг ажлыг гүйцэтгэх зорилготой байсан бөгөөд үүнд нийтдээ 1,5 сая ам. Доллар зарцуулжээ. Үүнд нийслэл болон Дархан-Уул, Орхон, төв, Дундговь зэрэг аймгийн 660 айл хамрагдаж, үүнээс 72 нь сүрлэн боодлоор дулаалсан байшинтай болж амжсан байна. Мөн 440 айл монгол гэрээ шинэ технологийн дагуу дулаалснаар эдийн засгийн хэмнэлт гаргажээ.

Энэ талаар судалгаа хийж үзэхэд эдгээр айл өрхийн түлшний зарцуулалт 2,3-2,6 дахин буурсан төдийгүй жилд 3,587 тонн нүүрс хэмнэсэн аж. Үүнээс үүдэн агаар мандал дахь нүүрс төрөгчийн давхар ислийн хэмжээг 5,380 тонноор бууруулж чадсан гэсэн тооцоо гарчээ.