Нийслэлийн Баянзүрх дүүргийн 20-р хороо Гачуурт тосгоны нутаг дэвсгэрт гольфийн талбай байгуулахаар үйл ажиллагаагаа эхэлсэн "Туулривер контрисайд" компани нутгийн иргэдийн эсэргүүцэлтэй тулгараад байгаа билээ. Энэхүү гольфийн талбай байгуулахыг эсэргүүцсэн иргэд өнөөдөр сэтгүүлчдэд хандлаа.

Тэдний үзэж буйгаар "Туулривер контрисайд" компани нь ундны цэвэр усны сан дээр газар хагалахыг хориглоно гэсэн төрийн хуулиа умартан хөрс хуулж, ой мод, хадлан бэлчээр сүйтгэж байгааг тодорхой нэр бүхий албан тушаалтнууд дэмжиж байгаа аж. Тухайн компанийн дэд захирал Б.Нармандах "гольфийн талбай байгуулахад хор нөлөөгүй. Харин ч байгуулснаараа хөгжил дэвшил авчирна. Бидний үйл ажиллагааг цөөхөн хэсэг хүн эсэргүүцэж байгаа" гэх мэтээр хэвлэл мэдээллээр цацаж байна. Туул голоо аврахыг хүссэн нутгийн иргэд, Улаанбаатарчууд олон байгаа. Биднийг гольфийн талбай байгуулснаар ямар ашигтай гэдгийг ойлгохгүй байна хэмээн басамжлан доромжилж байна.

Гэтэл энэ газарт гольфийн талбай байгуулснаар ямар их хор хохирол амсахыг мэддэг олон арван хүн бидний дунд байна. Нутаг усаа хайрлан хамгаалах сэтгэлтэй, Туул голоо аварч, ундны цэвэр усны эх үүсвэрээ хамгаалан үлдэхийг хүссэн иргэд хувь хүн, төрийн бус байгууллагууд бидэнтэй нэгдээч хэмээн тэд уриаллаа. Нийтдээ 67 га газарт гольфийн талбай байгуулах зөвшөөрөл авсан энэ компани одоогоор нутгийн иргэдийн эсэргүүцэлтэй тулгарч үйл ажиллагаагаа түр зогсоогоод байгаа бөгөөд багагүй газрын хөрсийг хуулж, тэнд ургадаг байсан эмийн ургамал, мод бутыг устгалаа гэж нутгийн иргэд дургүйцэж байв. Харин "Туулривер контрисайд"-ийнхан газрын хөрс хуулаагүй, Туул голын голдрилд нөлөөлөхгүй гэж байгаа ч газар дээр байдал ямар байгааг нүдээр харсан хүн ямар ч байсан нэгийг бодох биз гэж байлаа.

Энэ газрын зөвшөөрлийн бичиг баримтын ард багагүй хэмжээний авилга байгаа гэдгийг үгүйсгэх аргагүй хэмээн үзсэн эдгээр иргэд нийслэлийн Цагдаагийн газар болон Авилгатай тэмцэх газарт шалгаж өгөөч гэсэн бичиг хүргүүлээд байгаа аж. Өнгөрсөн долдугаар сарын 3-ны өдрөөс тэмцлээ эхэлсэн Гачуурт тосгоныхон "Гачуурт" нэртэй төрийн бус байгууллага байгуулж албан ёсны үйл ажиллагаа явуулахаар зэхэж байгаа гэнэ.

МОНЦАМЭ