Сүхбаатар дүүргийн 9, 10, 11, 12 дугаар хорооны нутаг дэвсгэрийн 210 га газрыг чөлөөлөх тухай нийслэлийн засаг даргын захирамж гарч, ажлын хэсэг байгуулагдлаа. "40 мянган айлын орон сууц" хөтөлбөрийн хүрээнд эдгээр хорооны нутагт орон сууцны VII хороолол барих юм .

Ажлын хэсэгт Нийслэлийн Захирагчийн ажлын алба, Газрын алба, Орон сууцны санхүүжилтийн корпораци, Барилга хот байгуулалт, төлөвлөлтийн газрын төлөөлөл багтжээ. Тухайлбал, Нийслэлийн газрын албанаас тэнд оршин сууж буй иргэдэд газраа чөлөөлж өгөх тухай бичиг хүргүүлж, хууль, тогтоомжийн дагуу шийдвэрлэх юм байна. Харин Нийслэлийн Барилга, хот байгуулалт, төлөвлөлтийн газар чөлөөлөгдсөн газарт барилгажилт, инженерийн байгууламж, шугам сүлжээний төлөвлөлт болон зураг төсөл хэрэгжүүлэгч байгууллагатай хамтран ажиллаж хэсэгчилсэн ерөнхий төлөвлөгөөнд хяналт тавих аж.

Орон сууцны санхүүжилтийн корпораци шаардагдах хөрөнгийн эх үүсвэрийг шийдвэрлэж хэсэгчилсэн ерөнхий төлөвлөгөөний дагуу эхний ээлжинд "Г" хэсгийг барилгажуулах ажлыг эхлүүлэх юм байна.