Холбооны Герман улсын Засгийн газар Монгол-Германы Техникийн болон Санхүүгийн хамтын ажиллагаанд зориулж 2008-2009 онд 18,5 сая евро нэмж олгохоор болов. Үүнээс гадна биологийн төрөл зүйлийг хамгаалах болон цаг уурын өөрчлөлтийн эсрэг авч хэрэгжүүлэх арга хэмжээнд зориулан 2,0 сая евро өгөх болжээ. Энэ тухай өнгөрсөн долоо хоногт Боннд болсон хөгжлийн бодлогын хамтын ажиллагааны ээлжит хэлэлцээний үеэр тохиролцсон байна.

Уг хэлэлцээг Монголын талаас Сангийн яамны Төрийн нарийн бичгийн дарга Д.Баттөр, Германы талаас Холбооны Эдийн засгийн хамтын ажиллагаа, хөгжлийн яамны Ази, Зүүн өмнөд Европ, Афганистаны асуудал хариуцсан төлөөлөгч, доктор Фридрих Кичелт нар удирджээ. Хэлэлцээний үеэр хоёр улсын өнгөрсөн онд хийсэн зөвлөлдөх уулзалтын үр дүнг үндэслэн, одоо хэрэгжүүлж буй болон цаашид хэрэгжүүлэх хамтын ажиллагаа, чухал ач холбогдол бүхий бусад асуудал хөндсөн тухай Гадаад хэргийн яамнаас мэдээлж байна.

Дээр дурдсан 20,5 сая евроны 9,0 саяыг нь санхүүгийн хамтын ажиллагааны, 11,5 сая еврог Техникийн хамтын ажиллагааны төсөл хөтөлбөрт тус тус зориулна. Мөн өмнөх жилүүдэд хэрэгжүүлж байсан төсөл, хөтөлбөрүүдийн санхүүжилтээс үлдсэн 3,2 сая еврог Санхүүгийн хамтын ажиллагааны хүрээнд шинэ төслүүдэд зарцуулахаар болсон байна. 1992 оноос эхэлсэн хоёр талын Техникийн болон Санхүүгийн хамтын ажиллагааны нийт санхүүжилт 244,7 сая евро болоод байна. Дашрамд дурьдахад, Германы Техникийн Хамтын Ажиллагааны Нийгэмлэгээс манай барилгын салбарт олон төсөл хөтөлбөрүүд хэрэгжүүлж байгаа юм.

МОНЦАМЭ