Танд энэ өдрийн мэнд хүргэе. Та өөрийгөө манай сайтын уншигч нарт танилцуулна уу?

Чамд ч гэсэн энэ өдрийн мэнд хүргэе. Намайг Бат-Эрдэнэ гэдэг. ”Баясах Aтлас” компанийн гүйцэтгэх захирал. Манай аав, ээж хоёр 2-лаа Сүхбаатар аймгийн уугуул иргэд. Одоо Дархан хотод амьдарч байгаа. Миний аав С.Ганжууржав Дарханы төмөрлөгийн үйлдвэрийн тухай судлан бариулж, анхны захирлаар болон Монгол улсын Геологийн яам, Хөнгөн хүнсний үйлдвэрийн зэрэг яамнуудад болон төрийн байгуулгуудад олон жил ажилласан. Ээжийн минь хувьд гэвэл Хөнгөн үйлдвэрүүдэд олон жил ажиллаж байгаад насны тэтгэвэртээ гарсан. Манайх 5 хүүхэдтэй, би айлын 3-дах хүүхэд. Монгол улсынхаа хөгжилд өөрийн чадлынхаа хэмжээгээр хувь нэмрээ оруулж яваа жирийн нэгэн залуу.

Та хаана ямар мэргэжлээр сургууль төгссөн бэ?

Би Компьютерийн техник менежментийн сургуулийг “Мэдээллийн системийн менежмент” мэргэжилээр суралцаж 1997 онд төгссөн. 2001 онд СЭЗДС-ийг “Санхүүгийн удирдлага” чиглэлээр бизнесийн удирдлагын магистрын зэрэг хамгаалсан.

Өмнө нь ямар ямар газар ажиллаж байсан бэ?

Нилээд олон газар ажил хийж байсан. Эд нараас дурдвал “Булигаар” ХК-нд нягтлан бодогч, Скайтел ХХК-д маркетингийн ажилтан,  ОНУХС-нд нягтлан бодогч зэрэг ажлуудыг хийж байсан. 2001 оноос төслийн байгууллагуудтай хамтарч бизнесийн сургалт, зөвлөгөө өгөх чиглэлээр ажиллаж байна. Үүний хүрээнд 2005-2006 онд Талх чихэр ХК-ний маркетингийн албанд багаараа ажиллан шинэ брэндийн бүтээгдэхүүн нэвтрүүлэх, төрөл бүрийн компаниудад бизнесийн зөвлөгөө өгөх зэрэг ажлуудыг хийсэн.

Өөрийн чинь хувьд санхүү эдийн засгийн мэргэжилтэй. Гэтэл үндсэн мэргэжлээсээ өөр яагаад барилгын салбарт хөл тавих болсон бэ?

Анх сургууль төгсчихөөд юугаа ч мэдэхгүй ажилд орж л байвал боллоо гэсэн бодолтой байлаа. Харин ажилласан газар бүртээ хүн үргэлж шинэ зүйл мэдэж, сурч байх ёстой. Янз бүрийн ажил хийж явсны дүнд нэлээн зүйлийг мэдэж авч сурсан. Үүний үндсэн дээр сүүлийн үед бизнес төсөл боловсруулах, бизнесийн зөвлөгөө өгөх ажил хийдэг болсон. Миний хувьд нэг газар ажиллах биш харин янз бүрийн тулгамдсан асуудлыг шийдвэрлэх, шинэ зүйлийг нэвтрүүлэх нь сонирхолтой байдаг. 2007 онд Баясах Трейд компани нь Польш улсын “Атлас” фирмийн Монгол дахь дистрибьютер болсон. Одоо “Атлас” бүтээгдэхүүнийг Монголын хэрэглэгчдэд хүргэх ажлыг хариуцах ажиллаж байна.

“Баясах трейд” ХХК-ний охин компани болох “Баясах Атлас” компанийхаа талаар бидэнд танилцуулаач?

“Баясах трейд” ХХК маань Польш улсаас Kowar, Appetita гэх мэт олон төрлийн хүнсний барааг импортолдог. “Баясах Атлас” ХХК-ийн хувьд энэ оны 5-р сараас эхэлж үйл ажиллагаагаа явуулсан. Польш улсын “Atlas” фирмийн барилгын материал, ялангуяа гадна фасадны материалыг оруулж ирэх, шаардлагатай бол фасадны ажлыг нь хийж гүйцэтгэдэг.

Нийтдээ Польш улсаас хэдэн төрлийн барилгын материалыг оруулж ирж байна вэ?

Хоёр жилийн өмнөөс манай компани уг материалуудыг туршилтын шугамаар худалдаалж байсан. Ингээд тодорхой хэрэглэгчидтэй болсон учираас ихээр оруулж ирэх болсон. Польшийн лидер, Европын брэнд “Атлас” фирмийн хөөсөнцөр дулаалгийн материал иж бүрнээр нь /Үүнд: хөөсөнцөрийн цавуу К-10, К-20, хөөсөнцөрийн хадаас, тор, грунт зэрэг материалууд орно/ төрөл бүрийн өнгийн чулуут шавардлага /гоёлын шавардлага, акрил, минерал төрлийн/, плитаны цавуу, чигжээс, барилгын гипс, шалны тэгшрэгч цемент зэрэг 10 гаруй төрлийн материалуудыг импортоор оруулж ирэн худалдаалж байна.

Энэхүү материалыг Монголчууд барилга байгууламжиндаа хэр ашиглаж байна вэ?

Одоогоор манай компаний оруулж ирж байгаа материалыг манай орны барилга угсралтын томоохон компаниуд болох “Гангар инвест”, “Алтай констракшн”, “Заг”, “Файнеринг интернэйшнл”, “Суруга Монгол” зэрэг олон байгууллага авч барилгадаа ашиглаж байна.

Уг барилгын материалыг ашиглаж барьсан барилгуудаас дурдвал?

Сүүлийн жишээ хэлэхэд саяхан бид ГТХХАН-ийн /GTZ/ “Хотын хөгжил, барилгын салбар болон мэрэгжлийн боловсрол, сургалтыг дэмжих хөтөлбөрийн хүрээнд зохион байгуулагдсан ”Угсармал орон сууцны барилгыг дулааны үр ашигтай болгон засварлах загвар" төсөл дээр хамтран ажилласан. Манай компанийн хувьд гадна ханын дулаалгын ажлыг өөрийн материалаар бүрэн хийж гүйцэтгэсэн.

Чингэлтэй дүүрэг 6-р хороолол, 5-р хороо, 8-р байр буюу World Plaza дэлгүүрийн хойд талд орших байр нь дулаан их алддаг учраас хүйтэн, байрны хойд талдаа цан цохидог байсан. Бид энэ байрны гадна гадаргууг цэвэрлээд Atlas Stopter дулаалгын системээ технологийн дагуу хийж гүйцэтгэсэн. Одоо тус байр гаднаас нь харахад маш гоёмсог яг л шинэ байр шиг, дотроо их дулаан болсон байгаа.

Дэлхий нийтэд эрчим хүчний үнэ өртөг ихсэж байгаа өнөө үед бид дулааны эрчим хүчээ энэ аргыг хэрэглэн хэмнэж сурвал өрхийн болон улсын эдийн засагт ихээхэн ашигтай юм.

Байгууллагынхаа болоод орон сууцны дулаалгын ажлыг танай компаниар хийлгэе гэсэн санал ирж байна уу?

Санал тавьж ирсэн хүмүүс байгаа. Саяхан гэхэд л Налайхаас 8-р байр шиг дулаалга иж бүрнээр нь хийлгэе гэсэн санал тавьсан. Ер нь хамтран ажиллая гэвэл бидний зүгээс татгалзах зүйл байхгүй.

Цаашдаа ямар материал оруулж ирэх төлөвлөгөөтэй байна вэ?

Бодож төлөвлөсөн зүйл байгаа. Ямар ч байсан эхний ээлжинд судалгаа явуулсны үндсэн дээр манай барилгын салбарт ямар материал оруулж ирвэл илүү хэрэгцээтэй байгааг дүгнэж үзээд нэмж оруулж ирэх материалаа сонгоно. Мөн яваандаа зарим материалыг нь эх орондоо үйлдвэрлэх санаатай байна.

Заавал барилгын компани гэлтгүй иргэд маань сонирхож ирэх юм уу? Аль материалыг нь илүү сонирхдог вэ?

Иргэд нэлээн сонирхож ирдэг. Тэд ихэвчилэн гоёлын шавардлагын материалыг илүү сонирхдог. Гэвч ирж байгаа хүмүүс маань дуртай өнгөө шууд авах гэдэг. Өнгө гэдэг чинь хэдэн зуун өнгө байдаг тул бид тоотой хэдэн өнгийг байнга байлгаж бусад өнгийг захиалж оруулж ирдэг. Иргэд үүнийг харамсалтай нь сайн мэддэггүй. Зарим гүйцэтгэгч компаниуд хямд үнийг илүү чухалчилдаг хандлагатай бол хувь хүмүүс чанарыг эхний шалгуур болгодог нь ажиглагдсан.

Польш, Германы материалын үнэтэй харьцуулбал хямдхан, Хятадын материалын үнэтэй харьцуулбал үнэтэй байгаа.

Манай орны хувьд барилгын салбар нилээд хөгжиж байна. Сайны хажуугаар саар зүйл байдагтай адил барилга ихээр баригдах тусам чанаргүй барилга олширч байна. Үүн дээр таны бодол?

Харин тиймээ. Захиалагч байгуулгууд гүйцэтгэгчээрээ Хятадуудыг авч ажиллуулдаг. Тэдэнд сайн хийдэг юм байна хийж чаддаггүй юм бас байна. Хятадууд мэдээж өөрсдийн ашигаа бодож хямд материалыг өөрийн орноос авч ашигладаг. Тэгтэл Хятад улсын цаг агаар манай орны уур амьсгалыг бодоход харьцангуй дулаан байдаг. Иймээс барилга барьж байхдаа өөрийн орны цаг уурт тохирох материалыг барилгадаа ашиглах хэрэгтэй. Барилгын материалдаа захиалагч компани анхаарал хяналт тавьснаар чанартай сайн барилга барих нэг үндэс болно.

Ярилцлага маань төгсөх тийшээгээ хандаж байна. Тэгэхээр танд барилгын салбарт сэтгэл эмзэглэж явдаг зүйл байвал манай сайтаар дамжуулж хэлнэ үү?

Нэгт барилгыг чанартай сайн материалаар чанарын өндөр технологийн дагуу барих хэрэгтэй. Хоёрт барилгын салбарт ажиллах өөрсдийн хүчийг бэлтгэх.

Заавал Хятадуудыг ажиллуулах биш өөрсдийн ард иргэдийг ажилтай болговол цаана нь амьдарч байгаа олон арван өрхийн амьжиргаа дээшилнэ. Иргэдийн амьжиргаа дээшилнэ гэдэг нь улс орон хөгжихийн эхлэл. Хэдийгээр Хятадууд ажил сайн хийдэг гэдэг боловч Монголчууд бас тэгж сайн хийж чадах чадвартай. Монголчууд Солонгос Америк зэрэг орнуудад сайн ажилладгаа олонд харуулсан. Тиймээс Монголчуудаа ажилладаг болгох тал дээр тодорхой системтэй бодлого явуулах, дэмжих ажил нилээн хийвэл энэ бүх зүйл шийдэгдэнэ гэж бодож байна.

Өөрийнхөө тухай болоод компанийхаа талаар бидэнтэй ярилцсан танд их баярлалаа. Таны бизнесийн ажилд сайтын нийт уншигчидынхаа өмнөөс өндөр амжилтыг хүсье.