Өдрөөр бус цагаар нэмэгдэж байгаа байрны үнийн өсөлтийн учир шалтгааныг тогтоох ажлын хэсэг байгуулагдав.

                Иргэдийн дунд дотоодын барилгын компаниуд, үл хөдлөх хөрөнгө зуучлалын төвүүд, мөн байрны ченжүүд байрны үнэ зохиомлоор хөөрөгдөж байна гэсэн ойлголт нийтлэг байгаа тул Засгийн газраас уг ажлын хэсгийг байгуулжээ.

           Сангийн яам, Монгол банк, Үндэсний статистикийн газартай хамтран байгуулсан орон сууцны суурь үнийн индекс тогтоох ажлын хэсэг өдгөө дундаж нь 80 саяд хүрээд байгаа орон сууцны үнийг барих бодит өртөг, зах зээлд нийлүүлэх боломжит үнэ зэрэгтэй нь харьцуулан судлах аж. Түүнчлэн барилгын материалын үнийг нэгбүрчлэн судалж, эрчимтэй өсөх болсон нь зохиомол эсэхт эдийн засгийн дүгнэлт хийх юм байна.

              2008 оны эхний улиралд нийт 19,4 тэрбум төгрөгийн барилга угсралт, их засварын ажил гүйцэтгэсний 84 хувь нь буюу 16,3 тэрбум төгрөгийн ажлыг дотоодын барилгын байгууллагууд хийжээ. Эдгээрийн 46,5 хувь нь орон сууцны барилга аж.

                Түүнчлэн барилгын материалын үнэ ч огцом нэмэгдэж буй бөгөөд ОХУ-аас авдаг хар цаас, хадаас, шохойны үнэ нэмэгдсэнийг эс тооцвол бусад бараа бүтээгдэхүүний үнэ харьцангуй тогтвортой байна. Харин БНХАУ-аас нийлүүлдэг цемент 75 хувь, хар цаас 20 хувь, тосон будаг 50 хувь, ханын цаас 66,7 хувь, улаан тоосго 2,7 дахин нэмэгджээ.