Ерөнхий сайд С.Баярын ОХУ-д хийсэн ажлын айлчлал дууслаа. Энэ удаагын айлчлалыг манай нийгэм эдийн засгийн олон салбарын хүмүүс сонирхож байсан. Тэр дундаа бензин шатахууны өндөр үнийн талаархи хойд хөршийн удирдлагуудтай хийх хэлэлцээрийн үр дүнг хүн бүр “чих тавин” сонсож байсан. Гэвч бензин шатахууны үнийг бууруулах ямар ч аргагүй гэсэн хариуг “орос ах нар” маань өгчээ. Азийн бусад орнууд жишээлбэл Сингапурт бензин шатахууны үнэ ханш манайхтай адил байгаа нь бусад орнуудын бензины үнийн жишигтэй адил байгааг нотолж байна. Иймд бензиний үнийг бууруулах ямар ч боломжгүй гэдэг байр суурийг Оросын тал илэрхийлжээ. Ингэхлээр бензиний үнийг дагаад хөөрөгдөж байгаа манай өргөн хэрэглээний зүйлүүд тухайлбал хүнсний бүтээгдхүүн, барилгын материал зэрэг зүйлүүдийн үнэ ханш буурахгүй нь.

          Ерөнхий сайдын ярилцсан бас нэг асуудал бол ОХУ-ын өмч гэгдэх манай Монгол иргэдийн 8 байрны асуудал юм. Мөн л Оросууд энэ талаар нааштай хариу өгсөнгүй хэвээр үлджээ.

            Харин хойд хөрш маань сүүлийн үед гадаад улс орнуудын анхаарлын төвд байгаа манай ашигт малтмалын орд газруудын нэг болох Асгатын орд газрыг эзэмших тухай асуудлыг хөндөөгүйн дээр манайд 40 мянган тонн үр тариа өгөхөөр болжээ. Мөн манайд уран боловсруулах хамтарсан үйлдвэр барих саналыг Оросын тал тавьж, ерөнхий сайд хоёр улсын цаашид хийх хамтын ажиллагааны тоонд оруулахаар болжээ.