Нийслэлд ойрын хэдэн жилд гурван гүүрэн гарц, долоон нүхэн гарц барихаар төлөвлөж байна.

Зүүн, Баруун дөрвөн зам дээр баригдах гүүрэн гарц нь таван давхар барилгын дайтай өндөр гурван түвшинд огтлолцохоор байх юм. Зураг төсөл батлагдвал гадны байгууллагуудаар гүйцэтгүүлэх аж. Харин 120 мянгат, Комбинатын цагаан хаалга, Ионсей эмнэлгийн хойд тал, Төв шуудангийн уулзвар, Их дэлгүүр, Гуравдугаар сургууль, 17-р сургуулийн дэргэд нүхэн гарц барих юм. Нүхэн гарцын барилгын ажлыг монголчууд өөрсдөө хийх боломжтой ажээ.

Энэ жилийн хувьд эдгээр байгууламжийн зураг төслийг хийж байгаа бөгөөд хөрөнгө мөнгө төсөвт тусгагдвал ирэх жилээс барьж эхлэх юм.

Харин Нарантуул захын баруун уулзварт баригдах гүүрэн гарцны зураг төсөл бэлэн болж, нийт 800 метр байгууламжийг эргэн төлөгдөх нөхцөлтэйгээр бариулахаар болоод байгаа юм. Нийт 18 орчим тэрбум төгрөгийн өртөгтэй энэ байгууламжийн ажлыг энэ онд эхлүүлж 2012 онд дуусгахаар төлөвлөж байна.