АНУ-ын хөрөнгө оруулалттай “Евро Кап”санхүүжилтийн корпораци Солонгос дахь салбараараа дамжуулан Эрдэнэт хотод 2000 айлын орон сууц барихаар болжээ.

            Эрдэнэт хотын удирдлагууд болон засаг дарга Г.Шархүү “Евро Кап” санхүүжилтийн корпорацитай дээрх орон сууцыг 2008-2011 онд барьж ашиглалтад оруулахаар гэрээ байгуулж гарын үсэг зуржээ.

            Эрдэнэт хотыг анх байгуулж байхдаа энэхүү 7-р хорооллыг барих төлөвлөгөө гаргасан боловч санхүүжилтын асуудлаас болоод өдийг хүртэл баригдаагүй байснаас одоо нэг хэсгийг нь Хятадууд барьж байгаа юм байна. Харин 7А хэсгийг нь “Евро Кап”санхүүжилтийн корпораци 100 гаруй сая төгрөгийн хөрөнгө оруулалтаар барихаар зураг төслийг нь гаргаад батлуулчихсан байгаа аж.

            Дээрх хорооллыг барих ажилчдын 30-аас доошгүй хувь нь Монгол ажилчид байна гэж гэрээнд тусгагдсан бөгөөд 2008 оны 6-р сарын 14-өөс эхлэн эхний 40 ажилчныг мэргэжлийн сургалтанд хамруулахаар болоод байгаа ажээ.