Монгол улсын Ерөнхийлөгч Н.Энхбаярын санаачилга, Ерөнхий сайд С.Баярын идэвхтэй дэмжлэгтэйгээр Үндэсний төв номын сангийн шинэ өргөө тавих болсон билээ.

                Зуны дунд сарын шинийн есний билэгт сайн өдөр шинэ номын өргөөний шав тавих ёслолын ажиллагааг нээж "Морин хуурын чуулга" , уртын дуучид ая дуугаа өргөж, лам хуваргууд ном уншлаа. БСШУ-ы сайд Н.Болормаа хэлсэн үгэндээ "Номоо алтаар урлаж, торгоор баринтагладаг, ном эрдмийг орой дээрээ залдаг уламжлалтай ард түмэн бол монголын ард түмэн. Энэхүү шинэ барилга нь зах зээлд шилжсэнээс хойш соёл урлаг, боловсролын салбарт хамгийн том хөрөнгө оруулалт боллоо. Орчин үеийн дизайнтай, хүүхэд залуус, өвгөд өтгөс хэн бүхний очих дуртай эрдмийн өргөө болно гэдэгт найдаж байна" гэлээ.

                 Ёслолын ажиллагаанд ерөнхийлөгч Н.Энхбаяр, УИХ-ын зарим гишүүн, Нийслэлийн засаг дарга бөгөөд Улаанбаатар хотын захирагч Т.Билэгт, ШУА-ийн ерөнхийлөгч Б.Чадраа, эрдэмтэн докторууд, соёл урлагийн төлөөлөгчид оролцсон юм. Монгол улсын Ерөнхийлөгч Н.Энхбаярыг Кувейт улсад албан ёсны айлчлал хийх үеэр Кувейтын засгийн газраас 20 сая америк долларын буцалтгүй тусламж олгож, түүнийг Үндэсний төв номын сангийн шинэ өргөөнд зориулж байгаа юм байна. Мөн Засгийн газраас нэмэлт хөрөнгө оруулалт хийх ажээ.

                Мөн ёслолын ажиллагааны үеэр Ерөнхийлөгчийн зарлиг сонордууллаа. Уг зарлигт дэлхийн утга зохиолын сонгодог 50 ботийг эх хэлнээ хөрвүүлэн хэвлүүлэх, энэ арга хэмжээнд засгийн газраас 495 сая төгрөг зарцуулахаар заажээ. Цаашид дэлхийн утга зохиолын шилдэг тавин ботийг ЕБС-иуд, МСҮТ, Их, дээд сургууль, хот, хөдөөгийн бүх номын санд үнэ төлбөргүй түгээх юм байна.