Барилгын бизнес хүчээ авч байгаа өнөө үед дотоодын барилгын компаниуд үүнийг дагаад хөгжсөөр байна. 2000 он гэхэд дорвитой ажил гүйцэтгэдэг манай барилгын компаниудыг нэрлэхэд тоотой хэд байсан. Харин одоо хэрэглэгч та сонголтоос сонголт хийх боломжтой болоод байна. Эдгээр сонгогдмол үндэсний компаниудын нэг бол “АTMOR” ХХК. Та энэ нэрийг сонссон нь лавтай. Учир нь энэ компани гэнэт гарч ирсэн шигээ гэнэт олны танил болсон. Олонд танигдсаны нууц нь маш сайн марктенг, цоо шинэ үйлчилгээ гэж мэргэжилтнүүд тайлбарладаг. Ингээд бизнесийн асар их өрсөлдөөн дундаас маш хурдтай гарч ирсэн нууцаас нь хуваалцахаар “АTMOR” ХХК”-ын ерөнхий захирал С. Саруулсайхантай “Барилга МН” уулзлаа.
Сур: Та компанийхаа тухай манай сайтын уншигчдад танилцуулахгүй юу?
С.С: Манай компани 2003 онд байгуулагдсан, түүнээс өмнө 3 жил салбарын судалгааны ажил хийгдсэн. Үндсэндээ барилга угсралт, сантехникийн чиглэлийн үйл ажиллагаа явуулдаг. Манай компанийн эрхэлдэг үйл ажиллагааны гол имидж нь сантехник угсралт. Тэр дундаа төвийн шугам сүлжээнээс хол барилга байгууламж, орон сууцны халаалт, халуун ус, бохирын асуудлыг шийдэж өгдөг. Тэр чиглэлээр шинэ техник технологи оруулж ирдэг. Технологийн хувьд Монголын хөрсөнд хамгийн их тохирсон, гадаадад байгаа хамгийн сайн технологиудыг оруулж ирэхийг зорьдог.
Сур: Танай компанийг хэрэглэгчид маш сайн мэддэг. Ийм богино хугацаанд олны танил болсон нууц нь маш сайн реклам зар сурталчилгаа, маркетинг явуулсан гэж үздэг?
С.С: Маш сайн маркетинг байсан нь үнэн. Би дээр хэлсэн байгуулагдахаасаа өмнө 3 жил судалгаа хийсэн гэж. Тийм ч болохоор орчноо сайн мэдэрч чадсан. Гэхдээ дан ганц реклам зар сурталчилгаагаар олны танил болсон сайн компани болж оршин тогтноно гэдэг өрөөсгөл ойлголт. Мэдээж маркетинг байна дээр нь чанартай үйлчилгээ, сайн санхүү, сайн технологи байх ёстой. Манай компанийн хамгийн гол баримталж явдаг зарчим бол хэрэглэгчиддээ чанартай үйлчилгээ үзүүлэх.
Сур: Компанийг өдий зэрэгтэй авч явна гэдэг сайн удирдагчтай холбоотой. Тэгэхээр тэр удирдагч энэ салбартаа нилээд мэргэшсэн хүн байх? Яагаад заавал энэ салбарыг сонгосон юм бэ?
С.С: Би геодези мэргэжилтэй хүн. Надад барилгын ч юмуу сантехникийн мэргэжил байхгүй. Гэхдээ энэ дэлхий дээр биеийн хүчний, оюуны, бизнесийн, хөрөнгө оруулалтын гэсэн 4 төрлийн л ажил байдаг. Эдгээрийн аль нэгийг л хүн хийж амьдардаг гэж үздэг юм байна лээ. Тэгэхээр би бизнесийн төрөлд нь ажилладаг, харин та бол оюуны хөдөлмөр хийдэг хүн байна. Тэр төрөлдөө хүн хэр сайн ажиллаж чадаж байна вэ гэдэг нь чухал болохоос биш ямар мэргэжилтэй байх нь чухал биш гэж би боддог. Энэ салбарыг сонгосны тухайд гэвэл би хүүхэд байхдаа хорооллын 13-р дунд сургуульд сурдаг байсан. Сургуульд маань гэр хорооллын хүүхдүүд их байдаг. Орон сууцанд амьдардаг, гэр хороололд амьдардаг хүүхдүүдийн хооронд ялгаа их гардаг байсан л даа. Надад энэ их нөлөөлсөн байх гэж боддог. Тиймээс одоо ч гэсэн бид ажилчдаа авахдаа ядаж гэр хороололд амьдарч үзсэн байх ёстой гэсэн шалгуур тавьдаг. Гэр хороололд нэг ч удаа амьдарч үзээгүй хүн яаж тэр хүмүүсийн зовлонг ойлгох вэ дээ?!
Сур: Тэгэхээр багаасаа их бодолтой хүүхэд байж дээ, тийм ялгааг харна гэдэг? Ямар айлын хүүхэд байсан бэ?
С.С: Өө харалгүй яахав, манай аав манай сургуулийн захирал Сүхээ гэж хүн байдаг байсан. Ээж маань багш. Аав ээж хоёр ажлаасаа гэртээ ирээд сургууль дээр болсон явдлыг хоорондоо ярилцдаг. Тэгээд л ярианаас нь би тэр ялгааг маш сайн мэддэг байсан. Би дунд сэхээтэн айлын хүүхэд байсан.
Сур: Тэр үеийн Саруулсайхан, одоогийн Саруулсайхан хоёрын хооронд мэдээж ялгаа байгаа байх? Хэр их баяжсан бэ?
С.С: Байлгүй яахав. Олон юм өөрчлөгдсөн л дөө. Аав маань 1990 онд нас барснаас хойш миний толгойноос цаашид яаж амьдрах вэ гэдэг бодол ерөөсөө гарч өгдөггүй байсан. Бие даан амьдрахад бэлэн биш байсан болоод ч тэр үү айж байсан байх. Би Израйльд ажиллаж амьдардаг байсан. Израйль өөрөө цэвэр усны нөөцгүй улс, гадаадаас усаа худалдаж авдаг. Гэсэн мөртлөө усыг зөв зохистой ашиглах тал дээрээ бол дээд зэргээр хөгжсөн улс. Тэндээс л надад яагаад Монголд ч гэсэн усыг ингэж ашиглаж болохгүй гэж гэсэн бодол төрж, судалгаа явуулж эхэлсэн. Баяжсаны тухайд уу?! /сур: хэсэг бодов/ Мэдээж ажил үйлс маань бүтэмжтэй урагшилж байна. Тэгэхээр бусдын л адил. Ямар ч байсан сайхан л амьдарч байна.
Сур: Компаниа анх байгуулж байхад бэрхшээлтэй асуудлууд гарч байсан байх?
С.С: Яахав ер нь бол бизнесийг анх эхлүүлэхэд бэрхшээл бага гардаг. Мэдээж санхүү энэ тэр гээд бий л дээ. Харин хөгжүүлээд өргөжүүлэх ирэхээр асуудлууд их гарч ирдэг. Түүний нэг жишээ нь зөвшөөрөл олгодог төрийн байгууллагууд. Ямар нэг зөвшөөрөл авах гэхээр л шийдэж өгөх хүн олдохоо больчихдог. Би ч шийдэхгүй, би ч мэдэхгүй гээд бүгд хариуцлагаас зайлсхийдэг. Сүүлдээ мэддэг шийддэг ч хүн байхаа больчихдог. Энэнээс болоод маш их бэрхшээл гардаг. Би энд юу гэж хэлэх гээд байна вэ гэхээр төрийн байгууллагууд ялангуяа тэр зөвшөөрөл олгодог хүмүүс ажлаа хийсэн шиг хийгээч ээ гэж. Нэг дарга дээр орохоор нэг өөр хүн зааж өгнө нөгөө хүн нь дахиад нэг хүн гээд л чирэгдүүлдэг. Хүнд суртлын асар том аппарат ажиллаад байна л даа.
Сур: Танай компаниар мөнгөтэй хүмүүс ч юмуу компаниуд мөнгөө төлөөд асуудлаа шийдүүлчихдэг байх. Гэтэл шийдүүлэх хамгийн их хэрэгтэй байгаа мөртлөө шийдүүлэх боломжгүй гэр хорооллын айлууд зөндөө байна. Таны бодлоор энэ асуудлыг яаж шийдэх ёстой вэ?
С.С: Тиймээ, энэ бол үнэхээр бодох ёстой асуудлын нэг. Хамгийн гол нь гэр хороололд амьдардаг хүмүүсийн сэтгэхүй байна. Тэд юу гэж сэтгэдэг вэ гэхээр “...Бид энд удаан амьдрахгүй, тэгэхээр тийм юм хийлгээд яах юм бэ” гэж боддог. Бодвол нүүнэ орон сууцанд орно л гэж боддог байх. Нэг ёсондоо тэд асуудлаа шийдүүлэх сонирхолгүй байна гэсэн үг. Энэ сэтгэхүйг л зөв өөрчлөх хэрэгтэй. Мэдээж дээрээс нь санхүүгийн асуудал байгаа. Тийм болохоор бид энэ сардаа багтаж багцын үйлчилгээг нэвтрүүлэх гэж байна. Энэ нь юу вэ гэхээр гэр хорооллын, зуслангын, классик стандарт хаус, рояал багц гэсэн 4 багцыг бид үйл ажиллагаандаа нэвтрүүлэх гэж байна. Нэг ёсондоо хэрэглэгчид эдгээр багцаас өөрсөддөө тохирохыг сонгох боломжтой болно гэсэн үг. Үйлчилгээний чанар ижил боловч тавих хэмжээ, үнэ зэрэг нь өөр өөр байна. Энэ бол хэрэглэгчдэд асар таатай боломжыг олгож байна гэсэн үг. Ялангуяа гэр хорооллын айл өрхүүдэд.
Сур: Сонгууль ойртож байна. Бизнесийн ажил улс төргүйгээр явахад хэцүү гэж ярьдаг. Та аль нам бэ?
С.С: Би нам бус. Надад бизнесээ явуулахад заавал аль нэг намын гишүүн байх шаардлагагүй. Манай компанийн үйл ажиллагаа тэртээ тэргүй ард түмэнд хэрэгтэй. Тэгэхээр аль ч нам төрд байлаа гэсэн манай ажлыг дэмжиж хамтарч ажиллахаас өөр аргагүй.