Нийслэлийн Баянзүрх дүүргийн 11-р хорооны нутаг Ногоон зорины орчим баригдаж байгаа "Ургах наран" орон сууцны хорооллын эхний гурван барилгыг хүлээлгэн өглөө.
Өнгөрсөн оны наймдугаар сард шавыг нь тавьсан энэ хорооллыг "40 мянган айлын орон сууц" хөтөлбөрийн хүрээнд Нийслэлийн засаг даргын тамгын газар, Хас банк, TV-5 телевиз хамтран "Монгол мөрөөдөл" төсөл санаачлан барьж байгуулж байгаа ажээ.
Энд 6400 гаруй айлын орон сууц, цэцэрлэг, сургууль, коллеж, эмнэлэг бүхий орон сууцны иж бүрэн хорооллын 114 айлын орон сууц өнөөдөр ашиглалтад орж байгаа бол энэ онд багтан дахин 480 гаруй айл сууцанд орох ажээ. Мөн эндхийн орон сууцны үнэ харьцангуй хямд буюу хоёр өрөө байр нь 15-23 сая төгрөгийн үнэтэй юм байна. Хорооллыг одоогоор уурын зуухаар халаах ч цаашдаа тавдугаар цахилгаан станц ашиглалтад орох учир уурын зуухтай нэг их удахгүй гэнэ. Харин бохирыг Налайх дүүргийн бохирын шугамнаас татсан бол усны хувьд тус хороолын ойролцоох ус татаж, дамжуулах дэд станцаас авч байгаа аж. Мөн төв замаас энэ хороолол хүрэх 1.5 км авто замыг шинээр барьжээ.
Орон сууцны хорооллын нээлтэд Ерөнхий сайд С.Баяр, "Монгол мөрөөдөл" төслийг санаачлагчид болох нийслэлийн засаг дарга асан Ц.Батбаяр, TV-5 телевиз, Хас банкны удирдлага оролцлоо. TV-5 телевизийн реалити шоуны ялагч Д.Эрдэнэбулган эндээс хоёр өрөө байраар шагнуулж энэ шоунд оролцсон зургаан гэр бүл Хас банкны хөнгөлөлттэй зээлд хамрагджээ. Тэдэнд өнөөдөр шинэ сууцных нь түлхүүрийг гардуулсан юм. Мөн Ерөнхий сайд С.Баярын гарын бэлгийн азын сугалааг энэ сууцанд шинээр орж байгаа Д.Алтанцэцэг хожиж Ерөнхий сайдаас морин хуур бэлгэнд авлаа.