"Дэнжийн 1000" зах байсан газрыг ЧД-ийн өмчлөлд шилжүүлж гэр хороололын соёл, үйлчилгээний барилга барих, иргэдэд ая тухтай амрах, хувиараа аж ахуй эрхлэх зэрэг зориулалтаар эзэмшүүлэхийг тус дүүргийн иргэд шаардаж хэвлэлийн бага хурал хийлгэв.

Уг захыг 1995 оны наймдугаар сард хувьчлах тендер зарлахад 10 компани оролцсоноос Бумбатай, Нарантуул гэсэн хоёр компани ялсан гэх баримт байх боловч Бумбатай гэж компани огт байгаагүй. Нарантуул компанид Батаа гэж захирал байгаагүй. Ингэхээр энэ тендерт хоёр байхгүй компани өрсөлдсөн болж таарч байгаа гэнэ. Энэ хувьчлалын талаар 10-аад жил үнэн мөнийг нь олж, хууль бус үйлдлийг баримт гарган тавьж илчилсээр атал мөнгөгүйг нь гүжирдэж, мөнгөтэй хүмүүсийн талд шийдэж, төгрөгтэй хүний төр гэдгээ баталсаар иржээ.                

Иймд энэ захын газрыг төрийн мэдэлд буцаан авч, иргэдийн гомдлыг барагдуулахыг хүсч ТӨХ болон Нийслэлийн Засаг даргад 2006 онд хандсан боловч асуудлыг өнөөг хүртэл шийдвэрлээгүй аж. Иймд ЧД-ийн иргэд газраа өмчлөх, эзэмших хууль ёсны бүрэн эрхээ хэрэгжүүлэхээр "Дэнжийн 1000"-ын гэр хороололын эрх ашгийг хамгаалах түр хороо байгуулжээ.

Энэхүү хэвлэлийн бага хуралд хуульч, өмгөөлөгч Ц.Монгол болон ЧД-ийн 10 дугаар хорооны иргэн С.Эрдэнэбат, Ц.Дамчаа, Д.Лхайсүрэн нар оролцсон юм.