Дөргөний хэмээн алдаршиж домог түүх болон яригдах дөхсөн Ховдын Дөргөн сумын нутаг дахь Чоно харайх гол дээр барьж буй УЦС-ын анхны генератор цахилгаан түгээсэн баярт үйл явдал болов.
Ховд аймгийн төвөөс 110 гаруй км зайтай орших эл УЦС нь 12 мгваттын хүчин чадалтай бөгөөд жилд 38 сая квт/цаг цахилгаан эрчим хүч үйлдвэрлэх аж. Улсдаа анхны хамгийн том УЦС болох энэхүү аварга том байгууламж ирэх аравдугаар сард бүрэн хүчин чадлаараа ажиллаж эхэлснээр баруун бүс нутгийг цахилгаан эрчим хүчээр хангах юм. Жилийн дөрвөн улиралд тасралтгүй ажиллах энэ УЦС-ыг БНХАУ-ын Шанхай группийн инженер, техникийн ажилтнуудтай манай инженерүүд хамтарч босгосон байна.
Нээлтийн ёслолыг нээж Түлш, эрчим хүчний сайд Ч.Хүрэлбаатар хэлсэн үгэндээ, манай улсын эрчим хүчний түүхэнд нэгэн алтан хуудас нээгдэж сэргээгдэх эрчим хүчний анхны том УЦС-тай боллоо. Ингэснээр баруун бүс нутаг найдвартай эрчим хүчээр хангагдаж, эрчим хүчний үнэ өртөг ч хямдрах болно. Манай инженер, техникийн ажилтнууд УЦС барьж сурах сургуулиа амжилттай төгслөө гэв. Дараа нь Монгол Улсын Ерөнхийлөгч Н.Энхбаяр хэлсэн үгэндээ, манай эцэг өвгөд ус-чандмань эрдэнэ гэдэг нь юутай үнэн үг вэ. Саяхан л би Ерөнхий сайд байхдаа анх шавыг нь тавьж, хөрөнгө мөнгөний асуудлыг шийдвэрлэх гэж зүтгэж явлаа. Бүтээе гэж зүтгэвэл бүтэхгүй зүйл ховор юм. Энэхүү УЦС ашиглалтад орсноор баруун бүс нутгийн тогтвортой хөгжлийн том алхам нээгдлээ. Төв рүү урсах баруун хязгаар нутгийн иргэдийн нүүдлийн цуваа багасах болно. Энэ аварга том барилга байгууламж, байгалийн сайхныг үзэх гэсэн гадаад, дотоодын зочин гийчдийн урсгал ч нэмэгдэнэ гэж онцоллоо.
Ийнхүү 40 гаруй жил яригдсан Дөргөний УЦС-ын эхний генератор нь илч гэрлээ түгээж, Чоно харайх голын уснаас гэрэл цахилгаан цацагдлаа.