Манай сайт энэ удаа орон сууцны чанарын асуудлыг хөндөж байна.

Байр, орон сууц гэж юуг хэлэх вэ. Хөнгөн блокны гадуур хөөсөнцөрөөр өнгөлөөд дээгүүр нь шавраар “өнгөлөн далдлалт” хийгээд эзэнд нь түлхүүрийг нь гардуулдаг 4-н хананы дунд гаргасан орон зай гэж үү.

Үндсэн гурван хэрэгцээгээ хангасан байхад Монголд амьдарч болно. Эхлээд идэх талхаа, дараа нь өмсөх хувцсаа, эцэст нь толгой хоргодох орон байраа зэхээд авсан байхад амьдрал өнгөтэй харагдана. Чухамдаа хүүхэд шуухдаа дааруулчихгүйхэн шиг толгой хоргодох сууцаа бэлдээд авсан цагт сэтгэл амар амьдрах тухай бид дандаа бодож явдаггүй гэжүү. Энэ бодлоос ч үүдэлтэй байх, манайхан ч хурааж хуримтлуулсан хэдэн төгрөгтэй болж. Улаанбаатарын энд тэнд нэг нэгийгээ халхлан баригдаж байгаа олон орон сууцнуудаас боломж бололцоогоо харгалзан байж захиална. Үүн дээр нь ч дөрөөлөн таних, танихгүй компаниуд, мэдэх мэдэхгүй хүмүүс барилга барина. Эцсийн үр дүн нь харин...

Барилгын портал сайтын хаягаар өдөр тутам олон и-мэйл ирдэг. Тэр дунд зөвлөгөө өгөөч, тэрний утас хаягийг өгөөч, туслаач гэсэн санал хүсэлтүүд байхаас гадна тэгж мэдээллээ шинэчлээч, хуучирсан байна гэх гомдол шүүмжлэлүүд бас байна. Мэдээж, орон сууцны чанар муу байгаа талаар гомдол санал байна. Тэр компанийн тэнд баригдаж байгаа байрнаас захиалсан чинь /үнэ гэж мэдээж тэнгэрт хадсан байгаа л даа/ хана нь цуураад, салхи сийгэх нь холгүй байна, хүйтэн байна, цонх, дотор тал гээд энд тэндээ цантаад байна, ус нь найрлагатай гараад байна, ядаж байхад заасан хугацаандаа ашиглалтад орохгүй юм гээд л хөвөрнө. Энэ бүхнээс ажиглавал мөнгөө төлөөд авсан орон сууц нь худалдаж авсан хүнийхээ сэтгэлд санаанд нийцэж байгаа нь үгүй аж.

Орон сууц бол аав, ээжээс үр хүүхдүүдэд нь үеэс үед өвлөгдөн үлддэг үнэт хөрөнгө билээ. Иймээс энэ олон хүний амь нас, амьдралыг дотроо тээж байдаг хөрөнгийг хүнд зарахдаа манайхан /энд орон сууцны барилга бариад зарж байгаа хүмүүсийг хэлж байгаа юм шүү/ ямар хайнга, хэдэн зоосны нүхээр харан, ашиг хонжоонд дулдуйдан хандаж байгаа нь үнэхээр харамсалтай. Одоо бүр “орон сууцны чанар муу байна” гээд ярьсаар байгаад дөжирч, энэ сэдэв мөнхрөх янзтай. Улаанбаатар газар хөдлөлийн идэвхжлийн өндөр идэвхитэй бүсэд оршдог гэдэг. Баригдаж буй барилгууд нь 8 баллд наанадаж тэсвэрлэнэ гэдэг ч 5-6 баллын чичирхийлэлд нураад унах нь энүүхэнд байлгүй дээ чанар чансаа муу байгаа нь илт байгаа юм чинь. Тэгээд бас газар хөдлөлийн 8 баллд тэсвэртэй энэ тэр гэж барьсан орон сууцаа зарах үүднээс уран сайхан үгээр рекламдана. Харин манайхан үүнд нь татагдан захиалга өгнө. Барилгын тухай шинэ батлагдсан хууль хүсэн хүлээж байсан зохицуулалтыг тусгаагүй байна лээ.

Эцэстээ гадаад, дотоодод эрүүл мэнд, идэр залуу насаа барьцаалан байж, хурааж хуримтлуусан хэдэн төгрөгөөрөө авсан байр ч үгүй, эрүүл мэнд, орох орон ч үгүй, утаат хотынхоо гудамжинд гарч, урцанд амьдрах вий дээ. Энэ орон сууцны чанартай холбоотой асуудлыг нэг тийш нь шийдэж, орон сууц өмчлөгчдийн эрх ашгийг хамгаалах холбоо гэж байдаг бол тэр нь олигтойхон ажилламаар юм, байхгүй бол байгуулмаар байна.

Монголчууд соёл иргэншилт ертөнцийн жамыг даган дандаа гэрт, утаан дунд амьдрахгүй нь тодорхой учраас орон сууцны олон хороолол баригдахаас өмнө эртхэн шиг арга хэмжээ авах хэрэгтэй байна.