Мандалговь-Улаанбаатарын чиглэлд шинээр барих хатуу хучилттай 100 км-ын автозам барилгын ажлын нээлт өчигдөр болж, шинэ замын шавийг тавилаа.

Нээлтэд оролцсон ЗТАЖЯ-ны Төрийн нарийн бичгийн дарга Ж.Бат-Эрдэнэ хэлэхдээ:

-Монгол Улсын Засгийн газар автозамын талаар баримталж байгаа бодлогодоо говь нутгийг Улаанбаатар хоттой холбосон хатуу хучилттай замтай болох талаар тусган анхаарч ажиллаж байгаа билээ гээд говийг нийслэлтэй холбох анхны зам нь Мандалговь-Улаанбаатарын чиглэлийнх болж байгааг онцлон тэмдэглэлээ.

Мандалговь хотоос эхэлж байгаа шинэ зам барих ажлыг "Монголын хурдны зам" ХХК гүйцэтгэх юм байна. Тус компани нь Монголын автозамын салбарт сүүлийн арваад жил тогтвортой үйл ажиллагаа явуулж, автозамын томоохон 20 гаруй төслийг амжилттай хэрэгжүүлсэн туршлагатай аж. Шинэ зам барих замчдыг ахалж ажиллах автозамын инженер Б.Чүлтэмжамцаас хэдий хэрийн хугацаанд замаа барьж дуусгах талаар тодруулахад:

-Яг төдийд өдийд дуусгана гэж одоогоор хэлэх боломжгүй. Материалаар тасрахгүй, бензин шатахууны үнэ тогтвортой, цаг агаарын сааталд орохгүй бол ажлаа шуурхайхан хийчихнээ. Манайх машин техник сайтай, одоогоор авто гридэр, экскаватор, индүүдэгч машин тус бүр хоёртой, нийтдээ арваад машин ажиллаж байна. Олон жил замын ажил хийсэн туршлагатай, мэргэжлийн арван замчинтай. Орон нутгаас зам ангийн ажилчдыг авч ажиллуулна. Тиймээс ажил нэлээд шуурхай явчих байх аа гэлээ.