Барилгын гол нэр төрлийн материалын үнэ сүүлийн саруудад огцом нэмэгдсэнийг статистикийн мэдээ гэрчилж байна.

                Одоогоор нийслэлд модон палкны үнэ дөрөвдүгээр сарынхаас 26.7 хувь, шалны банзны үнэ 26.6 хувь, дотор эмульсны үнэ 10 хувь, орос хар цаасны үнэ найман хувь, хятад хар цаасных дөрвөн хувь, цонхны нөлөөгүй шил 10.5 хувь, цонхны нөлөөтэй шил 12.5 хувиар тус тус өсчээ. Өнгөрсөн онтой харьцуулахад хөөсөнцөрийн үнэ 6.7 хувь, М-200 маркийн бетон зуурмагийн үнэ 7.7 хувь, вакум цонхных 12.5 хувь, хөнгөн бетоных 16.1 хувь, захалсан банзных 78.6 хувь, палкных 2.7 дахин, шалны ховилгүй банзных 2.8 дахин, Эрэл компанийн улаан тоосгоны үнэ гурав дахин нэмэгдсэн байна.

                Энэ нь барилгын ажлын улирал эхэлсэн, урд хөршид болсон байгалийн гамшигийн улмаас тээвэр саатаж буй зэрэгтэй холбоотой аж. Барилгын материалын эрэлт хэрэгцээ, тээвэрлэлт илт нэмэгдсэнээс төмөр замын ачаалал хэрээс хэтэрч хилийн боомтуудад бөөгнөрөл үүсээд байгаа юм.