Нийслэлд шинэчлэн засварласан хоёр ч замын нээлт боллоо. Замын хажуугийн гэрэлтүүлэг, хашлага, газар доогуурх борооны ус зайлуулах шугам гээд иж бүрэн замтай болсондоо нийслэлчүүд баяртай байв. Шинэ замын нээлтэд нийслэлийн Засаг дарга бөгөөд Улаанбаатар хотын захирагч Ц.Батбаяр, Автозамын газрын дарга Д.Бат-Эрдэнэ нарын хүмүүс оролцов.
Их сургуулийн гудамжны хатуу хучилттай 1.4 км зам, Хувьсгалчдын замын шинэчлэлийг Монгол уламжлалт ёсоор морин хуур эгшиглүүлэн нээсэн.
Түүнчлэн сүүн цацал өргөж, баярын дарсаар шинэ замаа мялаав. Энэ баярт үйл явдалд зам засварласан, шинэчилсэн ажилчид оролцсон. Өглөө босоход нь зам хаачихсан байхаар бухимдсан иргэд хүрзийг нь  булааж зодох нь халаг болдог. Хийсэн ажил маань бүхний нүдэн дээр ил байдаг болохоор бахархалтай  байдаг талаар тэд сэтгэгдэлээ хэлж байсан.
Үргэлжлэл 3-Р НҮҮРТТүүнчлэн тэнд ирсэн иргэд ч баярласан талархсанаа байн байн хэлж харагдсан. Их сургуулийн гудамжны Үамын шинэчлэлтийн нээлт дээр Сүхбаатар дүүргийн зургаадугаар хорооны иргэн Д.Баатар талархалаа илэрхийлж “Энэ замыг хотын төв замыг барьсаны дараа барьсан. Баригдсанаасаа хойш 50 гаруй жилийн дараа иж бүрэн засвар хийж байгаад нь их баярлаж байна. Энэ замыг дагаад Засгийн газар, Соёлын төв өргөө гээд олон газар бий. Түүнчлэн 20-иод аж нэгж байгууллага байдаг. Өнөөдөр энэ замаар гол шиг ус урсахаа болих нь. Замчдадаа баярлалаа. Хотын удирдлагуудад талархлаа. Энэ орчныг сайхан болгосонд талархаж байна” хэмээн ярьсан.  Мөн шинэ замын нээлтийн үеэр нийслэлийн Авто замын газрын дарга Д.Бат-Эрдэнэ сэтгүүлчдийн сонирхсон асуултад хариулсан.

-Зам шинэчлэхэд бэрхшээлтэй зүйл нь юу байсан бэ?
-Зам барихын хамгийн том зовлон нь газар чөлөөлөх асуудал байдаг. Арай гэж газраа чөлөөлөхөөр газар доорх инженерийн шугам сүлжээ янзлах гэж бөөн ажил болно. Үүнийг чинь цонхоороо хараад л шүүмжилнэ. Өчнөөн хоногийн өмнө зам хаачихаад юу ч хийсэнгүй гэсэн яриа эндээс гардаг юм. Энэ жил хотын зам дээр 800 гаруй хүн ажиллаж байна. Янз бүрийн машин техниктэй 18 компани оролцож байна. Шилдэг сайн гэсэн бүх инженер оролцож байна. Манай газар бүх хяналтаа тавьж байна.  Зам барина гэдэг маш хэцүү. Зам барих технологи, аргачлал маш нарийн. Бидэнд технологи, аргачлал байна Одоо бид Оросын хуучин технологиор зам барьж байна. Азийн орнуудын технологийг техниктэй нь оруулж ирэх хэрэгтэй байна. Бидний ашиглаж буй Оросын “Самосвол” 100 км-т 40 литр түлш хэрэглэж, таван тонныг ачиж байна.

-Зам засварыг ажил ямар хугацаанд хийж гүйцэтгэсэн бэ?
-Манайх нийслэлийн Хот байгуулалт, эрдэм шинжилгээ, зураг төслийн хүрээлэнтэй хамтран 2007 оны гуравдугаар сард энэ жилийн замын ажлуудын зураг төсвийг эцсийн байдлаар бэлэн болгосон. 2006 оны 10 дугаар сараас хийж эхлээд шүү дээ. Энэ жил 23 объектод зам барих өргөтгөх ажил хийсэн. Бүгдийг нэг зэрэг эхлэх боломжгүй. Бүх замаа хаачихаар хотын амьдрал яаж өрнөх вэ? Бид ажлаа гурван үе шаттайгаар явуулсан. Эхний ажил тавдугаар сарын 24-нд эхэлсэн. Дунд шатных нь наймдугаар сарын дөрөвнөөс, сүүлийнх нь есдүгээр сарын 10-наас эхэлсэн. Зунжин юугаа хийсэн юм гээд л зарим иргэд загнаад байгаа. Оройтлоо гэсэн хэл ам эндээс л гарч байгаа юм. Сөөлжүүлж хийж хөдөлгөөнөө зохицуулахаас арга байхгүй.

-Замыг шинэчлэн засварлахад хэчнээн төгрөг зарцуулсан бэ?
-Их ч мөнгөөр замын ажил хийлээ. 19.5 тэрбум төгрөг төлөвлөгдсөн. Энэ жил 32 км зам шинээр тавилаа. Нийслэл хотын хэмжээнд 360 гаруй хатуу хучилттай, 40-өөд км бетон хучилттай зам бий. Үүний 80 гаруй хувийг зайлшгүй шинэчлэх шаардлагатай. Энэ шинэчлэлийг өнөөдрийн ханшаар 150 гаруй тэрбум төгрөгөөр хийх тооцоо гарч байна. Орж ирсэн бүх хөрөнгө оруулалтыг энэ 80 хувь руугаа цацах уу, шинээр зам барих уу гэдэг асуудал тулгарсан. Улаанбаатар хотод гэр хорооллууд руу яаралтай зам тавих асуудал тулгамдаж байна. Дэд бүтцийн асуудлаас нэгдүгээрт  зам байдаг. Замгүй газар хэчнээн юм аваачиж овоолоод хэн очиж суух вэ?

-Замаа засчихлаа, гэхдээ гэрлэн дохио зарим замд дутагдалтай байгаа?
-Манай хотод 48 уулзварын хөдөлгөөнийг дохиогоор зохицуулдаг. Эдгээрийн 22 нь Солонгос, Японых. Үлдсэн нь 1960-1970-аад оны үед Орост үйлдвэрлэгдсэн. Сэлбэг хэрэгсэл нь олдохоо больсон. Монголчлоод ажиллуулдаг, байсхийгээд л зогсчихно.
Энэ жилийн тухайд иж бүрнээр хийж байгаа. Борооны ус зайлуулдаг шугам, гэрэлтүүлэг, явган хүний зам, ногоон байгууламжийн хайс хашлагатай нь хийж байна. Төмөрчин, Их сургууль, Хувьсгалчдын гудамжийг бүгдийг тэгж хийсэн. Сайхан гудамжнууд гарсан шүү.

-Ирэх жил энэ жилийнх шиг бүтээн байгуулалтын ажил өрнөх үү?
-Ирэх жилийн зураг  төсөв хийгдээд эхэлчихсэн. Хавраас тендер зарлагдана. Инженерийн байгууламж, хийц ихтэй ажлууд эрт эхлэнэ. Ажил, сунжрах, хөдөлгөөнд эрсдэл ихтэй, том том уулзваруудыг хаах асуудал нэлээд гарна даа.