Монгол Улсын Ерөнхийлөгч Н.Энхбаяр Сутай хайрхан уулын тэнгэрийг тайх төрийн ёслолд оролцохоор явах замдаа Говь-Алтай аймгийн Тайшир суманд баригдаж байгаа усан цахилгаан станцын ажлын явц байдалтай танилцжээ.

Баруун бүсийг цахилгаанаар хангах энэхүү томоохон байгууламж нь нийтдээ 30.3 сая ам.долларын хөрөнгөөр босч байгаа ба ашиглалтад орсноор Завхан, Говь-Алтай аймгийн цахилгааны хэрэгцээг бүрэн хангаж жилд 37 сая кв цахилгаан эрчим хүч үйлдвэрлэх юм. Өнгөрсөн жил Монгол Улсын төрийн тэргүүн энэхүү ажлын үйл явцтай танилцаж тухайн үед тулгамдаад байсан далангийн хамгаалалт босгох 4 сая ам.долларын санхүүжилтийн асуудлыг шийдүүлэхээр УИХ-д хандаж улсын төсвийн нэмэлтэд оруулснаар бодит ажил хэрэг болгосон байна. Үүнд ч аймгийн удирдлагууд, станцын цахилгаан техникийн ажилтнууд талархал илэрхийлж, энэ намрын борооны ус цугларахаар усан цахилгаан станц үндсэн хүчин чадлаараа ажиллана гэж байлаа. Усан цахилгаан станц 14 мянга гаруй кв км усны хуримтлалын талбай, 930 сая м куб эзэлхүүн бүхий усан сан, 52 км усны усны толио зэрэг баруун хязгаарт урд өмнө байгаагүй томоохон бүтээн байгуулалт болсон ба загас үржүүлэг, аялал жуулчлалын чиглэлээр ч энд төсөл хэрэгжүүлэх боломжтой юм. Одоогийн байдлаар Далангийн хярын өндөр далайн түвшинээс дээш 1700 м байхаас 30 см дутуу байгаа ч өөрийн станцын болон ойролцоох гурван сумын цахилгааны хэрэгцээг хангаж байгаа аж.

Ерөнхийлөгч Н.Энхбаяр Усан цахилгаан станцын Далангийн байгууламж, хяналт удирдлагын төв зэрэг бүтээн байгуулалттай танилцсаныхаа дараа холбогдох мэргэжилтнүүдээс зарим сонирхсон асуултандаа хариулт авлаа. Мөн энэ усан санг түшиглэн үйлдвэрлэл үйлчилгээний төв байгуулж болохыг зөвлөөд судалж үзэх нь зүйтэй гэв.