Аливаа хотын нүүр царай, өнгө төрхийг тодорхойлж байдаг гол зүйлийн нэг бол яах аргагүй зам, талбай байдаг. Гэвч замын асуудал хотын тулгамдсан асуудал болоод байгаа нь хэн бүхний нүднээ ил харагдаж байна.

Эвдрэл ихтэй, нарийхан замаар сүлжилдэх авто хөсгийн тоо өдөр ирэх тусам нэмэгдэж, түүний хэрээр замын ачаалал ихэсч ашиглалтаас гарах болж. Нийслэлийн Авто замын газраас энэхүү асуудлыг тодорхой хэмжээнд зохицуулж, зам талбай, гүүрүүдэд шинэчлэл, өргөтгөл хийж байгаа ч хуучирч элэгдсэн зам талбай, гүүрийн хурдыг гүйцэхгүй л байна. Гурвалжингийн гүүр гэхэд анхаарал татах боллоо. Энэхүү гүүрээр хүнд даацын машин техник явахыг хориглосон бөгөөд шинэчлэх ажлыг эхлүүлээд байгаа. Нийслэлийн Авто замын газрын Зам, барилгын хяналтын хэлтсийн дарга Г.Баттогтохтой уулзаж энэ жилд хийгдэх зам засварын талаар ярилцлаа.

-Энэ жилийн хувьд нийслэлд зам засварын ажил хэр хийгдэх вэ?

-Өнгөрсөн оноос нийслэлийн замд нэлээд түлхүү анхаарч эхэлж байна. Нийслэлд нийт 360 гаруй километр зам байдаг. Зам гэдэг бол тодорхой хугацаанд элэгдэж хорогддог учраас жил бүр урсгал засварыг хийж байх ёстой. Одоогоос хоёр, гурван жилийн өмнө хоёр, гурван тэрбум төгрөгийн замын ажил хийгдэж байлаа. Харин 2007 онд 19.5 тэрбум төгрөгийн ажил хийгдсэн. Энэ жилийн тухайд мөн ийм хэмжээний санхүүжилтээр замуудад өргөтгөл, урсгал засвар хийгдэнэ. Ер нь зам засвар, өргөтгөлийн ажлыг тухайн жилийн хөрөнгө санхүүжилтээс хамаарч хийдэг.

-Ямар ямар зам засвар хийх гэж байна вэ?

-Энэ жил Улиастайн гүүр, Долоон буудлаас Дамбадаржаагийн цагдаагийн пост хүртэл 0.9 километр зам, Таван шараас Шалган нэвтрүүлэх 22-ын товчоо хүртэлх 10 километр замыг өргөтгөх, Сүхбаатарын гудамж буюу талбайн баруун талын замыг шинэчлэхээр төлөвлөсөн.

Үүний дагуу тендэр зарлачихаад байна. Мөн нэг гүүр, дөрвөн замын тендер зарлагдсан. Энэ сарын 21, 28-нд зарим тендэрийг нээнэ.  

-Тендерийг хугацаа алдан зарласнаас болж чанар муутай зам баригдах асуудал гардаг?

-Ийм асуудал гардаг. Гэхдээ бид нар хууль номдоо нийцүүлж ажиллах ёстой. Жишээ нь, Гурвалжингийн гүүрний тухайд өнгөрсөн онд тендэр нь оройтож зарлагдсан.

Учир нь нээлттэй тендэр шалгаруулалт явуулахад шаардлага хангасан гүйцэтгэгч байгаагүй. Тиймээс дахин нээлттэй тендэр зарлаж “Аваргас” ХХК шалгарсан. Бид хуулинд нийцүүлж, ажил гүйцэтгэгч байгууллагуудыг сонгож авдаг. Гурвалжингийн гүүрний засварын ажил тодорхой хэмжээгээр явагдаж байгаа.

-Гурвалжингийн гүүрний шинэчлэлт хэзээ дуусах вэ?

-2007 онд Гурвалжингийн гүүрний их засварыг хийхээр төлөвлөсөн. Үүнийхээ дагуу сонгон шалгаруулалтыг гэрээ ёсоор хийж, дээр дурдсан “Аваргас” ХХК-ийг шалгаруулсан. Тус компанитай гэрээ хийхдээ гүүрийн шинэчлэлтийг энэ оны зургаадугаар сарын 30-нд дуусгахаар тогтсон. Графикт хугацаандаа багтаахыг хичээн ажиллаж байгаа. Чанарын өндөр түвшинд гүүрийн шинэчлэлийг хийх шаардлагыг бид тавьж байгаа. Манай хяналтын хэсгийнхэн байнга очиж шалгадаг.

-Зөвхөн авто зам гэлтгүй явган хүний зам сайжруулах талаар төлөвлөгдсөн үү?

-2007 оноос эхлээд бид замын зураг төсөл хийлгэхдээ зөвхөн авто зам биш хажуугийн явган хүний зам, тохижилт гэрэлтүүлгийн ажлыг давхар захиалж хийлгэсэн. Өнгөрсөн онд баригдсан замуудын ихэнхийг энэ л шаардлагаар хийлгэсэн байгаа. Энэ жил Хан-Уул дүүрэгт хоёр нүхэн гарц, Монгол улсын Боловсролын их сургуулийн урд талын “Ионсей” эмнэлгийн үүдэнд нүхэн гарц баригдана. Одоогоор зураг төслийн шатанд явж байна. Харин “Ионсей” эмнэлгийн нүхэн гарцны зураг төсөл бэлэн болсон. Үнэлгээгээр орох л үлдээд байна. Мөн зүүн, баруун дөрвөн замд давхар зам хийхээр төлөвлөсөн. Эдгээр ажлуудыг энэ онд багтаан ашиглалтад оруулах зорилго тавин ажиллаж байгаа.