БНХАУ-ын дэд даргын манай оронд хийж буй айлчлалын хүрээнд Монгол, Хятадын бизнес форум өнгөрөгч баасан гарагт зохион байгуулагдлаа.

                БНХАУ-ын дэд дарга Си Жин Пинийг дагалдан Хятадын гадаад худалдааг дэмжих хорооны дарга ноён Ван Жи Фэй тэргүүтэй БНХАУ-даа төдийгүй дэлхий дахинд нэр хүнд бүхий 150 гаруй бизнес эрхлэгчид ирээд байгаа юм. Тэдний оролцсон Монгол, Хятадын бизнес форум нь хөрш хоёр орны хоорондын худалдаа, тээвэр, эдийн засгийн хамтын ажиллагааны шийдвэрлэвэл зохилтой асуудлуудыг хэлэлцэх, Хятадын талаас томоохон хөрөнгө оруулалтыг татах зэрэгт чухал ач холбогдолтой гэж хоёр тал үзэж байгаа аж. Мөн энэ үеэр хоёр орны бизнес эрхлэгчдийн хооронд гэрээ хэлэлцээр, бизнесийн танилцах уулзалтууд боллоо.

                Энэхүү арга хэмжээний үеэр Монголын талаас МҮХАҮТ-ын дарга С.Дэмбэрэл, ГХОГХА-ийн дарга Ч.Ганзориг, АМГТХЭГ-ын орлогч дарга Д.Амарсайхан, "Ган хийц" компанийн ерөнхий захирал М.Даваасүрэн, Хятадын талаас ZTE корпорацийн дэд ерөнхийлөгч Цэн Ли, Хятадын үндэсний газрын тосны корпорацийн ерөнхий менежер Ван Юүпү, "Шенхуа" эрчим хүчний компанийн дэд ерөнхийлөгч Хао Гүй зэрэг хүмүүс илтгэл тавьж хэлэлцүүлэн Монгол, Хятадын бизнес эрхлэгчдийн цаашдын хамтын ажиллагааны асуудлаар чөлөөт ярилцлага өрнүүлж, гэрээ хэлэлцээр байгууллаа.