Гэр орноо хүссэн тавилгаараа тохижуулах хүсэл  байгаа л биз. Гэтэл сарын тань цалин 250 мянган төгрөг байдаг. Хоёр саяын үнэтэй иж бүрэн тавилга авч дийлэхгүй ч хүсэл байсаар л. Тэгвэл та “Мишээл” төвд нээгдсэн намрын уламжлалт үзэсгэлэнг сонирхоод нэг үзээрэй.
        Тус үзэсгэлэнг Барилга хот байгуулалтын яам, ХААН банк, Барилгын бирж хамтран 8-р сарын 31-ээс эхлэн энэ сарын 3-ныг хүртэл зохион байгуулж байна. Энэхүү үзэсгэлэнгийн үеэр ХААН банк орон сууцны зээл, тавилгын лизингийн зээлийн нэг цэгийн үйлчилгээг хэрэглэгчдэд хүргэж байгаа юм. Орон сууц худалдан авах гэтэл мөнгө дутсан бол 50 хүртэлх сая төгрөгийг 10 жилийн хугацаатай, сарын 1,5 хувийн хүүтэй зээлээр авч болох юм.
        Харин гэр ахуйн барааны лизингийн зээлийг зөвхөн үзэсгэлэнгийн үеэр таван сая хүртэлх төгрөгийг тавилга авах иргэдэд 24 сарын хугацаатай, сарын 1,8 хувийн хүүтэйгээр санал болгож байна. ХААН банкны Зээлийн бодлого зохицуулалтын газрын мэргэжилтэн Б.Баттогтохын хэлж буйгаар тус үзэсгэлэнгийн дараа тавилгын лизингийн зээлийн хүү нь сарын 1,9 хувь хүртэл өсөх ч хугацаанд нь өөрчлөлт орохгүй гэнэ.
        Үзэсгэлэнд барилгын материал импортлогч, үйлдвэрлэгч 220 гаруй аж ахуйн нэгж оролцож байгаа юм. Тус үзэсгэлэнгийн үеэр барилгын шинэ технологитой танилцуулж, түүнийг хэрхэн хэрэглэх талаар сургалт явуулсан юм.